Friday, August 17, 2007

အာလူးငါးခြောက်အချဉ်ဆီပြန်ဟင်း



အမေကြီးကန်က နှမတော်ရဲ့ ကိုကိုက အာလူးငါးခြောက်ဆီပြန်ဟင်းလေးစားချင်တယ်ဆိုလို့ ချက်နည်းလေး ပေးလိုက်ပါနော်။ နှစ်ကိုယ်တူတိုင်းပြည်ထဲက မောင်မယ်နှစ်ယောက်အတွက်ဆိုတော့ လိုတဲ့ ပစ္စည်းလေးတွေကို ပြောပြမယ်နော်။ အာလူးကို ဘယ်အရွယ်ရှိလဲလို့ မေးလိုက်တော့ တစ်ထွာတဲ့။ ကြီးတော်မူလိုက်တာတော်။ တော်တို့ အမေကြီးကန်က လူကောင်တွေကြီးရုံတင်မကဘူး အသီးအနှံတွေလဲ ကြီးလှချည်လားအေရဲ့လို့ ပြောမိပါတယ်။
သူ့ဆီက အာလူးက တစ်ထွာဆိုတော့ နှစ်ယောက်စာကို အာလူး တစ်လုံးလောက်နဲ့ပဲတော်မှပါလေ။ အာလူးကို အခွံနွှာ ရေဆေး ပြီးတော့ အစိတ်လေးစိတ်၊ ဆားလေးနဲ့နယ်ပြီး ရေဆေးလိုက်ပြီးတော့ စကာထဲမှာ ရေပြန်စစ်ထားလိုက်နော်။ ငါးခြောက်ကလဲ ပေါ့လိုက်တာအရမ်းပဲတဲ့။ အဲ့ဒီတော့ ရေလေးဆေးပြီးတော့သာ စကာထဲ ရေစစ်ထားလိုက်ပေါ့နော်။ မန်ကျည်းသီးလေးကိုလဲ ရေနွေးလေးနဲ့ စိမ်ထားလိုက်ပါဦး။
ကြက်သွန်ဖြူနီနွှာ၊ ပါးပါးသေးသေးလေးတွေဖြစ်အောင်လုပ်ထားနော်။ ခရမ်းချဉ်သီးလေးကြိုက်တတ်ရင် တစ်လုံးလောက် ပါးပါးလေးလှီးထားလိုက်နော်။ အားလုံးအဆင်သင့်ဖြစ်ပြီဆိုရင်တော့ မီးဖိုပေါ် ဒယ်အိုးလေးတင်၊ ဆီထည့် (ကိုယ်နှစ်သက်သလောက်)၊ ဆီပူလာရင် နနွင်းမှုန့်လေး နည်းနည်းထည့်၊ ကြက်သွန်ဖြူနီကိုထည့်ပြီး ဆီသတ်ပေးပါနော်။ ကြက်သွန်ဖြူနီ နည်းနည်းနွမ်းလာရင် ငရုတ်သီးအရောင်တင်မှုန့်လေး ထည့်လိုက်ပြီး ဆက်မွှေပေးနော်။ ငံပြာရည်လေး နည်းနည်းထည့်လိုက်ပါ။ ခရမ်းချဉ်သီးလှီးထားတာလေးတွေ ထည့်ပါ။ ခရမ်းချဉ်သီး အဖတ်လေးတွေ လိမ်သွားတဲ့အထိ စိတ်ရှည်လက်ရှည် မီးနွေးနွေးနဲ့ တည်ပေးနော်။ ပြီးတော့ အာလူးတွေထည့်ပြီး မွှေပေးပါနော်။ တဆက်တည်း ငါးခြောက်ကို ဆက်ထည့်ပြီး မွှေပေးပါ။ ဆား၊ အချိုမှုန့်၊ တဆက်တည်းထည့်နော်။ ပြီးတော့ ရေနည်းနည်းလောက်ထည့်ပြီး မီးနွေးနွေးနဲ့ ဟင်းအိုးကို ဖြေးဖြေးချင်း ပေးဆူပါ။ အာလူးထဲ ငါးခြောက်ရဲ့ အနံ့အရသာလည်းဝင် အနူးလည်းညီအောင်ပေါ့။ ရေခမ်းလာပြီဆိုရင် မန်ကျည်းနှစ်လေးအုပ်ပြီး သေချာနှံ့အောင် မွှေပေးဦး။ ပြီးတော့မှ မီးနွေးနွေးနဲ့ မန်ကျည်းနှစ်လေးခမ်းအောင်တည်။ မန်ကျည်းနှစ်ထည့်လိုက်ရင် အာလူးထဲ စိမ့်ဝင်နေတဲ့ ဆီတွေ အပေါ်ကို ပြန်ဝေ့တက်လာပါလိမ့်မယ် (ဆီပြန်ခေါ်တယ်လို့ အမေတို့က ပြောကြတာပဲ)။ အာလူးထဲကိုလဲ မန်ကျည်းသီးထဲက အချဉ်အရသာလေးပါ စိမ့်ဝင်လာပါလိမ့်မယ်။ ရေခမ်းလို့ ဆီပြန်လာပြီဆိုရင် အပေါ့အငံကို စိတ်ကြိုက်မြည်းပြီးတော့ မီးပိတ်ပြီး ဟင်းအိုးလေးချထားလိုက်ရုံပါပဲ။ ကြိုက်တတ်ရင် ကြက်သွန်မြိတ်ဖြစ်ဖြစ်၊ နံနံပင်လေးဖြစ်ဖြစ် အပေါ်ကနေ အုပ်ပေးလိုက်ပါနော်။ အဲ့ဒါဆို အနံ့အရသာမွှေးမွှေးလေးနဲ့ အာလူးငါးခြောက်ဆီပြန်ဟင်း ရပါပြီရှင်။ လိုက်ဖက်တဲ့အစားအစာတွေက ဟင်းခါးတစ်မျိုးမျိုး (ဗူးသီးကြာဇံ၊ ကြက်ရိုးဂွေးတောက်ရွက်ဟင်းခါး၊ ဂေါ်ဖီကြာဇံ)၊ ဟင်းရွက်သုပ်တမျိုးမျိုး၊ ပဲတောင့်ရှည်ကြက်ဥကြော်၊ ပန်းမုန်လာကြော်တစ်မျိုးမျိုး၊ ကြက်ဥ ဆူးပုတ်ရွက်ကြော်၊ သခွါးသီး၊ မုန်လာဥနီ၊ ဂေါ်ဖီဖတ်၊ ရှောက်ရွက်၊ ကန်ဇွန်းရိုးနီမန်ကျည်းသီးနဲ့ပြုတ် တို့စရာတို့ပဲ ဖြစ်ပါတယ်။ နှမတော်ရေ့့့ လက်စွမ်းပြလိုက်နော့့့့် 

0 comments:

Post a Comment