Thursday, August 16, 2007

နန်းပြားသုပ်နဲ့ ကြက်ရိုးတိုဟူး (ပဲပြား)ဟင်းခါး

မနေ့က ဧည့်သည်တွေလာတော့ ကြက်သားဟင်းတွေ ချက်ထားတာ အများကြီးကျန်သေးတယ်လေ။ ထမင်းဟင်းလဲ စားချင်စိတ် မရှိဘူ့း့့  ဘာစားရမလဲ စဉ်းစားမိတော့ အရသာရှိရှိလေးနဲ့ ထိထိမိမိလေးဖြစ်သွားအောင် နန်းပြားသုပ်ရင် ကောင်းမယ်လို့ တွေးမိတယ်။ ဆီချက်၊ နံနံပင်၊ ကြက်သားဟင်းလဲ ရှိတယ်ဆိုတော့ နန်းပြားသုပ်စားမယ်လို့ ဆုံးဖြတ်ပြီး လုပ်ငန်းစလိုက်ပါတယ်။ တိုဟူးလဲ ၀ယ်ထားတာရှိနေတော့ ဟင်းခါးဆိမ့်ဆိမ့်လေးကို ပူပူနွေးနွေးလေး သောက်လိုက်ရရင်ကောင်းမှာပဲလို့ တဆက်တည်း တွေးမိပြန်တယ်။ အဲ့ဒါနဲ့ပဲ ကြက်သားဟင်းကို ပြန်မနွှေးခင် အသားလေးတွေဖြစ်အောင် နွှင်၊ အသည်းအမြစ်တွေကို ခပ်သေးသေးဖြစ်အောင် ပြန်လှီးပြီး ဟင်းအိုးကို မိုက်ကရိုဝေ့ဖ်ထဲထည့်ပြီး နွှေးလိုက်ပါတယ်။ ရေနွေးအိုးကို တည်ထားတယ်။ ရေနွေးအိုးဆူတာနဲ့ နန်းပြားတွေကို ထည့်ပြီး ပြုတ်လိုက်တယ်။ တစ်ဆက်တည်းမှာပဲ ကြက်ရိုးပြုတ်အိုးလေး တည်ထားလိုက်တယ်။ ကြက်သွန်ဖြူ၊ ချင်း ဓါးပြားလေးရိုက်ပြီး ထည့်ထားလိုက်တယ်။ ဆား၊ သကြား၊ အချိုမှုန့် နည်းနည်းလေးပါ ထည့်လိုက်တယ်။ အဲ့ဒီအချိန်မှာ ဂေါ်ဖီ၊ ကြက်သွန်နီတို့ကို ပါးပါးလှီးထားလိုက်တယ်။ နန်းပြားလည်း ရရော၊ ရေအေးအေးနဲ့ ဆေးပြီးတော့ ရေစစ်ထားလိုက်တယ်။ နံနံပင်နဲ့ ပဲသီးကိုပါ ခပ်ပါးပါးလှီးထားလိုက်တယ်။ ဟင်းရည်အိုးပွက်ပွက်ဆူလာရင်အရသာလေး မြည်းကြည့်လိုက်တယ်။ ပြီးတော့ တိုဟူးကို အတုံးလေးတွေ လှီးထည့်လိုက်ပြီး နောက်တစ်ကြိမ် ပေးဆူလိုက်ပါတယ်။ ဂေါ်ဖီဖတ်လေးတွေကို ခပ်ကြီးကြီးလေးဖြစ်အောင်လှီးပါတယ်။ဟင်းအိုးဆူလာတာနဲ့ဂေါ်ဖီဖတ်လေးထည့်လိုက်ပြီး ဆူလာရင် အပေါ့အငံမြည်း၊ ငရုတ်ကောင်းမှုန့်လေးခပ်ပြီး မီးပိတ်လိုက်ပါနော်။
ကဲ့့့  နန်းပြားသုပ် စမယ်နော်။ ပန်းကန်ထဲကို နန်းပြားလေးထည့်၊ ကြက်သားဟင်းထည့်၊ ဂေါ်ဖီ၊ ကြက်သွန်နီ၊ နံနံပင်၊ ပဲသီး၊ ဆားအနည်းငယ်၊ ငံပြာရည်၊ သံပုရာရည်၊ ငရုတ်သီးအကျက်မှုန့်၊ ဆီချက်တို့ကို ထည့်ပြီးတော့ သေချာနှံ့အောင်နယ်လိုက်ပါတယ်။ ခပ်စေးစေးလေးကြိုက်ရင် ပဲမှုန့်အကျက်မှုန့်လေး ထည့်လိုက်နော်။ ကိုယ်ကြိုက်တဲ့ အရသာမျိုးလေးဖြစ်အောင် သုပ်နော်။ ချဉ်ငံစပ်အရသာလေးနဲ့ နန်းပြားသုပ့့့်  တိုဟူးရဲ့ ခပ်ဆိမ့်ဆိမ့်အရသာ ဟင်းခါးလေးနဲ့ ကောင်းလိုက်တာနော့့့် ။ သူငယ်ချင်းတို့လဲ ထမင်းမစားချင်တဲ့အခါကျရင် အလွယ်တကူစားလို့ရမယ့် နန်းပြားသုပ်လေးကို သုပ်စားကြည့်ပါလားနော်။

0 comments:

Post a Comment