Saturday, July 24, 2010

မုန်လာကင်မ်ချီ


          ချစ်သောမောင်နှမများအားလုံး မင်္ဂလာပါရှင်။ ဒီနေ့တော့ ကျွန်မရဲ့ မောင်နှမများကို မုန်လာကင်မ်ချီလုပ်နည်းလေး မျှဝေပေးပါရစေနော်။
          လိုအပ်တဲ့ပစ္စည်းတွေကတော့ မုန်လာဥ အရွက်ရောဥပါ အပင် ၂၀၊ ကောက်ညှင်းမှုန့် ထမင်းစားဇွန်း တစ်ဇွန်းမောက်မောက်၊ ချင်း လက်နှစ်ဆစ်၊ ကြက်သွန်ဖြူ ၁၀ မွှာ၊ ငရုတ်သီးစိမ်း (အစပ်စားနိုင်သလောက်)၊ ငရုတ်သီးခြောက်အပုပွတောင့် ၅ တောင့်၊ ဆား၊ သကြားနဲ့ ဟင်းခတ်မှုန့်တို့ပါနော်။
          မုန်လာဥတွေကို အရွက်သီးသန့်၊ ဥသီးသန့်ဖြစ်အောင် ဓားနဲ့ပိုင်းဖြတ်ပြီး သန့်စင် အောင် ဆေးကြောပေးပါ။ ပြီးရင် မုန်လာရွက်ရော ဥရောကိုပါ ဆားနဲ့ပက်ထားပေးပြီး ၁ နာရီလောက် ထားလိုက်ပါနော်။ ပြီးရင်တော့ မုန်လာရွက်တွေ မုန်လာဥတွေကို ရေနဲ့ ဆေးပေးပါ။ ပြီးတော့မှ မုန်လာရွက်တွေကို ရေစင်အောင် ညှစ်ပစ်၊ မုန်လာဥတွေကိုလည်း အခွံနွှာ၊ ကိုယ်နှစ်သက်တဲ့ပုံစံလှီးပေးထားပါနော်။ ကောက်ညှင်းမှုန့်ကို ရေလက်ဖက်ရည် ပန်းကန်လုံး တစ်လုံး ထည့်ပြီး ကျိုပေးပြီး အအေးခံထားပေးပါ။ အဲ့ဒီအချိန်မှာ ချင်းကြက်သွန်ဖြူတို့ကို အခွံနွှာ ရေဆေးပေးထား၊ ငရုတ်သီးစိမ်းကို ရေဆေးပေးထားပါ၊ ငရုတ်သီးအပုပွတောင့်ကိုလည်း အညှာချွေ၊ အစေ့ထုတ်ပြီး ရေနွေးနဲ့ စိမ်ပေးထား၊ ပြီးတော့မှ ငရုတ်သီးအပုပွတောင့်ကို ထောင်းပေးထားပါ။ ပြီးရင် ချင်း၊ ကြက်သွန်ဖြူနဲ့ ငရုတ်သီးစိမ်းတို့ကို ကြိတ်ပေးထားပါ။
          အားလုံးအသင့်ဖြစ်တဲ့အခါ ဇလုံတစ်လုံးထဲ မုန်လာဥ၊ မုန်လာရွက်ရယ်၊ ထောင်းထား တဲ့ ငရုတ်သီး အရောင်၊ ကြိတ်ထားတဲ့ ချင်းကြက်သွန်ဖြူငရုတ်သီးစိမ်းတို့ရယ်၊ ကောက်ညှင်းကျိုထားတာရယ်၊ ဆား၊ သကြားနဲ့ ဟင်းခတ်မှုန့်တို့ အားလုံးကို သမအောင် နယ်ပေးပါနော်။ ပြီးတော့မှ ဖန်ပုလင်း ဒါမှမဟုတ် ပလတ်စတစ်ဗူးသန့်သန့်ထဲ မုန်လာရွက် တွေ တစ်ထပ်၊ မုန်လာဥတွေ တစ်ထပ်စီထည့်ပြီး သိပ်ထားပါတယ်။ ရာသီဥတုပူတာနဲ့ပဲ ၁ ရက်နဲ့ ၁ ညလောက်ဆို စပြီး ချဉ်ပါပြီ။ ၂ ရက်ဆိုရင်တော့ ကောင်းကောင်းချဉ်ပါပြီနော်။
          ငရုတ်သီးစိမ်းလေးနဲ့မို့လေ စားရတာ ခပ်စပ်စပ်လေးနဲ့ မွှေးမွှေးလေး တော်တော်လေး စားလို့ကောင်းပါတယ်။ မုန်လာချဉ်လုပ်ပြီး သုပ်စားမယ်ဆိုရင်တောင် အဆင့်တွေ များနေဦးမယ်၊ ဒီနည်းလေးက ပိုသန့်ပြီး ပိုစားကောင်းတယ်လို့ အမေနဲ့ ညီမတွေက ပြောပါတယ်။ အဲ့ဒါနဲ့ပဲ ဒီနည်းလေးကို မောင်နှမတွေအတွက် လက်ဆင့်ကမ်း လိုက်တာပါနော်။
          မုန်လာရွက်မရှိလဲ မုန်လာဥချည်းသပ်သပ် ဒါမှမဟုတ် မုန်လာပင်ပေါက်တို့ကို ဒီနည်းနဲ့ အချဉ်တည်လို့ ရပါတယ်နော်။ ချဉ်ဖတ်ကြိုက်တဲ့ မောင်နှမတွေအတွက် ခံတွင်း တွေ့စေရပါမယ်နော်။

10 comments:

  1. မမလု...
    လမ်းဘေးမှာအထမ်းနဲ့ရောင်းတဲ့မုန်းဟင်းခါးတောချက်လေးအကြောင်း
    ချက်ပုံချက်နည်းလေးအချိန်ရရင်ရေးပေးပါလား...

    ReplyDelete
  2. မမရေ
    ရှမ်းကြက်သွန်ချဉ် လုပ်နည်းလေး မျှဝေပေးပါလို့ တောင်းဆိုပါရစေနော်။ ပိုးတီချဉ်လေး လုပ်စားချင်လို့ပါ။

    ReplyDelete
  3. This comment has been removed by the author.

    ReplyDelete
  4. မမလုလုရေ.. ဒီနေ့ဘဲအပြေးသွားဝယ်ပီး လုပ်စားတော့မယ်။

    ReplyDelete
  5. မမလု... ကျေးဇူးတင်တယ်..... အရမ်းတော်တယ်နော်.....

    ReplyDelete
  6. မလုရေ...ကျေးဇူးအများကြီးတင်ပါတယ်နော်...

    ReplyDelete
  7. ဘာဟင်းလေးဘဲချက်ချက်.....ဒီလင့်လေးကမရှိမဖြစ်လေးပါ....မလုကိုကျေးဇူးအရမ်းတင်ပါတယ်....

    ReplyDelete
  8. ညီမလုလေးရေ..
    ကျေးဇူးပါ..
    အခုမှတွေ့လို့ နည်းလေးယူထားလိုက်ပါပြီ..
    အားရက်ကျရင်လုပ်မယ်နော်..
    အခန်းအပူချိန်မှာပဲလုပ်ပြီးလို့ချဉ်သွားရင် ရေခဲသေတ္တာထဲထည့်သိမ်းလို့ရလား ညီမလေး.အပြင်မှာပဲထားလည်းရလား..?
    :D

    ReplyDelete
  9. မလုလုရေကိုရီးယားစစ်စစ်မုန်ညင်းဂင်မချီလုပ်နည်းရှိရင်သင်ပေးပါခင်ဗျာ

    ReplyDelete