Saturday, September 6, 2008

မြီးရှည်အရည်ဖျော်

အားလုံးမင်္ဂလာပါရှင်။ ကျွန်မရဲ့ မောင်နှမများကို ဟင်းအသစ်ချက်မကျွေးဖြစ်တာ ရက်အနည်းငယ် ကြာသွားတဲ့ အတွက် ပျက်ကွက်တာကို ပထဦးဆုံး တောင်းပန်ပါရစေနော်။ အိမ်က တူမအကြီးမလေး နေမကောင်းဖြစ်နေတာရော၊ ပြိုင်ပွဲတစ်ခုမှာ ၀င်ပြိုင်ရင်း ဆီမီးဖိုင်နယ်လ်ပွဲရောက်မှ ကိုယ်နိုင်နေလျက်နဲ့ တစ်စုံတစ်ခုမှားယွင်းမှုကြောင့် ရှုံးသွားရတဲ့ကိစ္စလေးတွေအတွက် ကျွန်မစိတ်ထိခိုက်သွားလို့ပါနော်။ ပြိုင်ပွဲကိစ္စအတွက် ကျွန်မ စိတ်ထဲခံစားရတာတွေများသွားတဲ့အတွက် ကျွန်မ ဟင်းချက်ကျွေးဖို့ ပျက်ကွက်သွားပါတယ်။ ဒီနေ့ကျွန်မရဲ့ မောင်နှမတွေကို မြီးရှည်အရည်ဖျော်လုပ်နည်းလေးကို ချက်ကျွေးပါရစေဦးနော်။ နေကောင်းစပြုလာတဲ့ တူမတော်ကလည်း ထမင်းမစားချင်ဘူး၊ မြီးရှည်ကို အရည်လေးနဲ့ စားချင်တယ်ဆိုတော့ သူ့ကိုချက်ကျွေးရင်းနဲ့ ချစ်မောင်နှမများကိုလည်း မျှဝေပေးလိုက်ရပါတယ်နော်။
လိုအပ်တဲ့ပစ္စည်းတွေကတော့
မြီးရှည်ဖတ်၊
အသားကောင်းကောင်းဝက်သား၊
ဝက်နံရိုး၊
ခရမ်းချဉ်သီး၊
နာနတ်ပွင့်အနည်းငယ်၊
မြေပဲလှော်၊ (မကြိုက်ရင်မထည့်ပါနဲ့)
ပဲငံပြာရည်အပျစ်၊
ပဲငံပြာရည်အကျဲ၊
ဆား၊
သကြား၊
ငရုတ်သီးခွဲခြမ်း၊
နံနံပင်၊
ကြက်သွန်မြိတ်၊
ငရုတ်ကောင်းမှုန့်၊
ဟင်းခတ်မှုန့်အနည်းငယ်နဲ့
ဆီတို့ပါနော်။

ဟင်းရည်အတွက် ၀က်နံရိုးကို အရွယ်တော်လေးတွေဖြစ်အောင် တုံးပြီး ရေထည့်ပြီး မီးဖိုပေါ်တင်ပြီး တစ်ရည်ပွက်အောင် တည်ပြီး အဲ့ဒီတစ်ရည်ကို သွန်ပစ်လိုက်ပါ။ ပြီးတော့မှ ၀က်နံရိုးကို ဆား၊ သကြား၊ အချိုမှုန့်တို့နဲ့နယ်၊ မီးဖိုပေါ် အိုးတင်ပြီးတော့ ဂျင်းအ၀ိုင်းလိုက်လှီးထည့်ပြီး ပထမလုံးရေလေးနဲ့ တစ်ရေ ခမ်းအောင်တည်ပါ။ ပထမတစ်ရည်ခမ်းပြီဆိုမှ နောက်ထပ် ဟင်းရည်အိုးထဲ ရေထပ်ထည့်ပြီး ဟင်းရည်အိုး ပွက်ပွက်ဆူပြီး နံရိုးနူးတဲ့အထိ တည်ပေးပါ။ နံရိုးနူးလောက်ပြီဆိုမှ ကြက်သွန်ဖြူ ဓါးပြားရိုက်ထည့်ပါ။ မီးအသင့်အတင့်နဲ့ ဟင်းရည်အိုးကို ဆူအောင် တည်ပေးထားပါ။ ကြိုက်တတ်ရင်တော့ ဟင်းရည်အိုးထဲကို တရုတ်နံနံပင်အရိုးလေးတွေ ထုထည့်ပေးပါဦးနော်။

အသားဟင်းအတွက် ၀က်သားကို ရွေးပါတယ်။ ၀က်သားကို အဆီအခေါက်မပါ၊ အသားချည်းသပ်သပ် တောက်တောက်စင်းပြီး ဆား၊ အချိုမှုန့်၊ သကြား၊ ချင်းနုပ်နုပ်စင်းတို့နဲ့ ရောနယ်ပါ။ ကြက်သွန်ဖြူနီနဲ့ ငရုတ်သီးကို ထောင်းပါ။ ခရမ်းချဉ်သီးပါးပါးလှီးပြီး နုပ်နုပ်စင်းပါ။ အဆင်သင့် ဖြစ်ပြီဆိုရင် မီးဖိုပေါ် ဒယ်အိုးတင်၊ ပြီးတော့ ဆီထည့်၊ ထောင်းထားတဲ့ ကြက်သွန်ဖြူနီငရုတ်သီးကို ထည့်ပြီး ဆီသတ်၊ နာနတ်ပွင့်လေး နှစ်ဖတ်လောက်ထည့်ပြီး မွှေပါ။ ပြီးရင် ခရမ်းချဉ်သီးထည့်၊ ခရမ်းချဉ်သီးဖတ်လေးတွေ လိပ်တက်လာပြီဆိုရင် တော့ နုတ်နုတ်စင်းထားတဲ့ အသားလေးတွေထည့်ပြီး မွှေပါ။ ပဲငံပြာရည် အကြည်၊ ပဲငံပြာရည် အနောက် နှစ်မျိုးလုံးထည့်ပါ။ ငံပြာရည်နည်းနည်းလောက်ထည့်ပါ။ ရေနည်းနည်းလောက်ထည့်၊ ခဏတည်ထားပြီး အသားလည်း နူး၊ ဆီလည်းပြန်လာပြီဆိုလျှင် ဟင်းအနှစ်ကျက်ပါပြီ။

တခြား မရှိမဖြစ် လိုအပ်တဲ့ အဆာပလာတွေကတော့ မြေပဲလှော်ကို အခွံနွှာပြီး မညက်တညက်လေး ထောင်းထားပေးပါ။ ကြက်သွန်ဖြူကို ပါးပါးလှီးပြီး ဆီချက်ကြော်၊ ဆီချက်ရပြီဆိုရင် ပန်းကန်လုံးထဲ ပြောင်းထည့်၊ ပြီးတော့မှ ငရုတ်သီးခွဲခြမ်းမှုန့်ကို ဆီထဲ လှိမ့်ပြီး ငရုတ်သီးကြော်လေးလုပ်၊ အရမ်းမတူးခင်မှာ အမြန်ချလိုက်နော်။ ပဲငံပြာရည် အပျစ်ကို ပန်းကန်လုံးထဲထည့်၊ ပြီးတော့ဟင်းချိုရည်လေး နည်းနည်းနဲ့ စပ်ထားပါ။ကြက်သွန်မြိတ်၊ နံနံပင် ပါးပါးလှီးထားပါ။

စားပွဲပြင်ခါနီးတဲ့အခါ စကာလေးထဲကို မြီးရှည်ဖတ်ထည့်၊ ပြီးတော့မှ ပွက်ပွက်ဆူနေတဲ့ ဟင်းချိုရည်အိုးထဲ ထည့်ပြီး တူနဲ့ မြီးရှည်ဖတ်တွေကို ဟိုဘက်ဒီဘက်လှည့်ပေးပါနော်။ မြီးရှည်ဖတ်အိပြီ ဆိုရင်တော့ ရေစစ်ပြီးတော့မှ စားပွဲပြင်မယ့် ပန်းကန်ထဲကို ထည့်ပါနော်။
စားပွဲပြင်မယ်ဆိုရင် မုန့်ဖတ်လေးထည့်၊ ဟင်းရည်ပူပူလေးကိုထည့်၊ ၀က်နံရိုးနူးအိအိလေးပါအောင် ခပ်ထည့် ပါနော်။ ပြီးတော့အသားဟင်းထည့်၊ မြေပဲလှော်ထောင်း၊ ကြက်သွန်ဖြူဆီချက်၊ ငရုတ်သီးကြော်လေးထည့်ပြီး စားရုံပဲနော်။ ဟင်းရည်ပူပူလေးကို ပန်းကန်လုံးလေးထဲ ထည့်၊ ပြီးတော့မှ ငရုတ်ကောင်းမှုန့်လေးခပ်၊ ကြက်သွန်မြိတ်လေး ဖြူးပြီး မုန်ညင်းချဉ်နဲ့ တွဲဖက်စားသုံးပါနော်။ အားပေးကြပါဦးနော်။

3 comments:

  1. စားမယ် ၀ါးမယ်
    အကုန်ကြိုက်တယ်
    မမလုလု ဘာပြိုင်ပွဲမှာ ဘာဖြစ်တာလဲဟင်
    ပြောပြလို့ရရင် ပြောပြပါလား
    ၀ိုင်းစဉ်းစားပေးမယ်နော်
    စားဖိုမှူးစိတ်ညစ်လို့ ဟင်းမချက်ရင် အိမ်သားတွေ ဗိုက်ဟောင်းလောင်းနဲ့ဖြစ်နေဦးမယ် :P
    fighting!!!!

    ReplyDelete
  2. မမလု အဲဒါ မန်းတလေး စတိုင်မြီးရှည်လား

    ReplyDelete
  3. ညီမလေးကစ်ကစ်ကို ကျေးဇူးတင်ပါတယ်ာ။ ကြိုက်သလောက်သား စားနော်။
    စိုင်းရေ့့့ မန်းလေးစတိုင်တော့ ဟုတ်ဘူး။ အိမ်မှာ အဲ့ဒီလိုပဲ အလွယ်တကူ ချက်စားဖြစ်တာပါ။

    ReplyDelete