Saturday, February 23, 2008

ခေါင်းတစ်ရာသားအိုးကပ်

ဒီနေ့တော့ ကျွန်မရဲ့ချစ်မောင်နှမတွေကို ငါးဘဲအိုးကပ်လေး ချက်ကျွေးပါရစေဦးနော်။ ခေါင်းတစ်ရာသားကိုစားသုံးပါက မှတ်ဥာဏ်ကောင်းတယ်လို့ငယ်တုန်းက သင်ခန်းစာထဲမှာ သင်ခဲ့ဖူးတယ်နော်။ ငါးစားရင် အရိုးစူးမှာ သိပ်ကြောက်တဲ့ ကျွန်မရဲ့အိမ်ကအကိုတော်နဲ့ မောင်တော်အတွက်လည်း အရိုးပါ ၀ါးစားလို့ရတဲ့ ငါးလေးအိုးကပ်ကို ချက်ကျွေးရင် အဆင်ပြေတယ်လေ။ ကလေးတွေအတွက်ဆိုရင်လည်း အရိုးပါစားလို့ငါးအိုးကပ်လေးနဲ့ ချဉ်ပေါင်ရွက်ဟင်းရည်ချွဲချွဲလေး ချက်ပေးရင် ကြိုက်ကြတာမို့ ချက်ကျွေးလိုက်ပါတယ်နော်။ ငါးအိုးကပ်ချက်ဖို့အတွက်လိုအပ်တာတွေကတော့ ငါးဘဲ၊ ကြက်သွန်ဖြူ၊ ကြက်သွန်နီ၊ ချင်း၊ ငရုတ်သီးအရောင်မှုန့်၊ နနွင်းမှုန့်၊ ငံပြာရည်၊ ဆီ၊ ငရုတ်သီးစိမ်း၊ ပင်စိမ်းရွက် သို့မဟုတ် နံနံပင်တို့ပါနော်။

ငါးဘဲကို ခေါင်းနဲ့ဝမ်းဗိုက်သားတွေမပါအောင် ဖဲ့ပြီး ရေစင်အောင်ဆေးပြီး ရေစစ်ထားပါနော်။ ပြီးရင် ငါးကို ဆား၊ အချိုမှုန့်အနည်းငယ်၊ ငံပြာရည်၊ နနွင်းမှုန့်တို့နဲ့ နယ်ပေးပါ။ ချင်း၊ ကြက်သွန်ဖြူနဲ့အနီကိုလည်း အခွံနွှာရေဆေးပြီး မထူမပါးလေး လှီးပေးထားပါ။ ပြီးရင် ငရုတ်ဆုံထဲကို ငရုတ်သီးအရောင်မှုန့်လေး ထည့်ပြီး ရေလေးနည်းနည်းထည့်ပြီး ဖျော်လိုက်ပါ။ ပြီးတော့မှ လှီးထားတဲ့ ချင်းကို အရင်ထည့်ထောင်းပါ။ ပြီးရင် ကြက်သွန်ဖြူနီတို့ကို အတူ ရောထောင်းထားပေးပါ။ ငရုတ်သီးစိမ်းကိုလည်း ရေဆေးပြီး မထူမပါးလေးတွေဖြစ်အောင် လှီးပေးထားပါ။ နံနံပင်ကိုလည်း အမြီးဖြတ်သန့်စင်ထားပြီး ရေစင်အောင် ဆေးထားပေးပါနော်။
အားလုံးအသင့်ဖြစ်ပြီဆိုရင်တော့ မီးဖိုပေါ် ဒယ်အိုးတင်၊ ပြီးရင် ဆီထည့်၊ ဆီပူလာပြီဆိုရင်တော့ နနွင်းမှုန့်လေး နည်းနည်းထည့်လိုက်ပါပြီ။ ပြီးရင် ထောင်းထားတဲ့ ငရုတ်သီးကြက်သွန်တို့ကိုထည့်ပြီး ဆီသတ်ပါ။ ဆီသတ်နံ့မွှေးလာပြီး ရွှေအိုရောင်ပြောင်းလာတဲ့အခါမှာတော့ နယ်ထားတဲ့ ငါးတွေကိုထည့်ပြီး ငရုတ်သီးတွေနဲ့ နှံ့အောင်မွှေပေးပါနော်။ အပေါ့အငံအရသာကို မြည်းပြီး မီးခပ်နွေးနွေးနဲ့ပဲ ဖြေးဖြေးချင်းအိုးကပ်အောင် တည်ပေးပါနော်။ အိုးကပ်ခါနီးကျမှ ပါးပါးလှီးထားတဲ့ ငရုတ်သီးစိမ်းလေးတွေထည့်ပါ။ ဆီဖျစ်ဖျစ်မြည်ပြီး ငါးလေးတွေခြောက်သွားပြီရင် ငါးလေးတွေကို ဟိုဘက်ဒီဘက်လှန်ပေးပြီး နံနံပင်လေးအုပ်လိုက်ပါနော်။ အဲ့ဒါဆိုရင်တော့ နံနံပင်နံ့သင်းသင်းလေးနဲ့ ငါးလေးအိုးကပ်စပ်စပ်လေးရပါပြီနော်။ ကင်ပွန်းရွက်ဟင်းရည်၊ ချဉ်ပေါင်ဟင်းရည်သောက်တို့နဲ့ တွဲဖက်သုံးဆောင်ပါနော်။

2 comments:

  1. မချက်ချင်ဘူး ချက်ပြီးသားဘဲစားတော့မယ်

    ReplyDelete
  2. It is my favourate curry.

    ReplyDelete