Wednesday, August 2, 2017

ဝက်အူချိုနဲ့ မှိုမျိုးစုံကော်ရည်ဆမ်း

Reactions: 


ချစ်သောမောင်နှမများအားလုံး မင်္ဂလာပါရှင့့့်  
ဒီနေ့တော့ မောင်နှမများကို ၀က်အူချိုနဲ့ မှိုမျိုးစုံ ကော်ရည်ဆမ်းလေး ချက်ကျွေးပါရစေဦးလားရှင့့့် 

ရှီတာကေးမှိုနဲ့ ကြက်နားရွက်မှိုတို့ကို ရေနွေးနဲ့ ၁ နာရီလောက် အရင်စိမ်ပေးပါ။ ပြီးတော့မှ မီးဖိုပေါ်တင်ပြီး ပွက်ပွက်ဆူအောင် တည်၊ ရေအေးနဲ့ ထပ်ဆေးပြီး လိုသလို အရွယ်အစား ညှပ်ပေးထားပါ။

ဝက်အူချိုကို ရေနဲ့ သန့်စင်အောင် ဆေးကြောပြီး ကြက်သားမှုန့်၊ ပဲငံပြာရည်အကျဲ၊ ပဲငံပြာရည်အပျစ်၊ သကြား၊ ခရုဆီ၊ နှမ်းဆီမွှေး၊ တရုတ်မာဆလာ၊ ငရုတ်ကောင်
းမှုန့်တို့နဲ့ နယ်ပြီး နာရီဝက်လောက် နှပ်ပေးထားပါ။
ပြီးရင် ဒယ်အိုးတစ်လုံးထဲ ဆီနည်းနည်းထည့်၊ ပြီးတော့ ၀က်အူချိုကို ကြော်ပေးပါ။ အရောင်လေး ရဲရဲလေး ရလာတဲ့အခါ ဆယ်ထားလိုက်ပါ။ အေးသွားတဲ့အခါ တစ်လက်မခွဲ အရှည်လောက်လေးတွေ ညှပ်ထားပါ။

ကြက်သွန်ဖြူကို ဓားပြားရိုက်၊ ကြက်သွန်နီကို လေးစိတ်ထိုးပြီး ခုနက အူချိုကြော်တဲ့ ဆီထဲထည့်ပြီး ဆီမွှေးသတ်ပါ၊ မွှေးလာပြီ ဆိုရင် မှိုတွေထည့်ပါ၊ ကြက်သားမှုန့်အနည်းငယ်ထည့်ပါ။ သမအောင် မွှေပေးပါ၊ ရေလေးအနည်းငယ်ထည့်ပြီး မှိုလေးတွေ အိသွားအောင် အဖုံးအုပ်ပြီးတည်ပါ။ မှိုလေးတွေ အိတာနဲ့ ၀က်အူချိုတွေကို ထည့်ပါ၊ ကော်မှုန့်ကို ရေလေးနဲ့ ခပ်ကျဲကျဲဖျော်ပြီး ဟင်းအိုးထဲ လောင်း ထည့်ပြီး မွှေပေးပါ၊ ကော်ရည်ပျစ်လာပြီဆိုရင် တရုတ်နံနံလေး အုပ်လိုက်ပါ။ အနံ့အရသာနဲ့ ပြည့်စုံလှတဲ့ ၀က်အူချိုနဲ့ မှိုမျိုးစုံ ကော်ရည်ဆမ်းလေး ရပါပြီ့့့ ထမင်းပူပူနဲ့ ထမင်းပေါင်းလိုလည်း သုံးဆောင်နိုင်ပါတယ့့့်  အူချိုလေးတွေ ကြော်ပြီး လှီးဖြတ်ပေးထားတာလေးတွေကို ၀က်သားဒုတ်ထိုးလိုလည်း လုပ်စားလို့ရတယ့့့် 

အချဉ်ကတော့ လွယ်ကူမြန်ဆန်လှတဲ့ ဘိတ်ချဉ်လေးနဲ့ ဆတ်လတ်ရွက်၊ ကြက်သွန်မြိတ်၊ ခရမ်းချဉ်သီး၊ ဂေါ်ဖီထုပ်တို့နဲ့ တွဲဖက်သုံးဆောင်နိုင်ပါတယ်ရှင့့့် 

0 comments:

Post a Comment