Monday, March 24, 2008

ဖက်ထုပ်ပြုတ်

Reactions: 

မြန်မာဟင်းတွေချည်း ချက်ကျွေးနေတာ ရိုးအီသွားမှာစိုးလို့ ဒီတစ်ခါတလှည့်ပြောင်းပြီး တရုတ်အစားအစာလေး ချက်ကျွေးပါရစေဦးနော်။ လိုအပ်တဲ့ပစ္စည်းတွေကတော့ ကြက်သား ဒါမှမဟုတ် ၀က်သားအသား၊ ကြက်သွန်ဖြူ၊ ကြက်ဥ၊ ချင်း၊ ဆား၊ သကြား၊ ကော်မှုန့် (corn flour)၊ ဂျုံမှုန့် (wheat flour)၊ အချိုမှုန့်၊ နှမ်းဆီ၊ တရုတ်မာဆလာ၊ ပဲငံပြာရည်အပျစ်၊ ပဲငံပြာရည်အကြည်နဲ့ ဖက်ထုပ်ရွက် (rice paper) တို့ပါနော်။
ဝက်သားအသားသက်သက် (၅၀) ကျပ်သား ကို သန့်ရှင်းအောင် ရေဆေးပြီး နုတ်နုတ်စင်းပါနော်။ ပြီးရင် ချင်း (ခြစ်ပြီးသား စားပွဲတင်ဇွန်း ၃ ဇွန်း) နဲ့ ကြက်သွန်ဖြူ (ခြစ်ပြီးသား စားပွဲတင်ဇွန်း ၅ ဇွန်း)ကိုလည်း ပြင်ထားပေးပါ။ ဂျုံမှုန့် စားပွဲတင်ဇွန်း (၃) ဇွန်းနဲ့ ကော်မှုန့် စားပွဲတင်ဇွန်း (၃) ဇွန်းကိုလည်း ပြင်ပေးထားပါ။ ပဲငံပြာရည်အပျစ် (၃) ဇွန်းနဲ့ အကြည် (၃) ဇွန်းပြင်ပေးထားပါ။ တရုတ်မာဆလာ လက်ဖက်ရည်ဇွန်း (၁) ဇွန်း ပြင်ပေးထားပါနော်။ ဆား၊ သကြားနဲ့ အချိုမှုန့်တို့ကိုလည်း ပြင်ပေးထားပါ။ ကြက်ဥ(၅)လုံးကိုလည်း အနှစ်ကိုဖယ်ပြီး အကာတွေချည်း ယူထားပေးပါ။ နှမ်းဆီ စားပွဲတင်ဇွန်း (၂) ဇွန်းကိုလည်း ပြင်ပေးထားပါ။

ဇလုံတစ်ခုထဲကို ၀က်သားနုတ်နုတ်စင်းထားတာတွေထည့်ပါ။ ပြီးရင်တော့ ဆား၊ သကြား၊ အချိုမှုန့်၊ ခြစ်ထားတဲ့ ချင်း၊ ကြက်သွန်ဖြူ၊ ကော်မှုန့်၊ ဂျုံမှုန့်၊ ပဲငံပြာရည်၊နှမ်းဆီ၊ တရုတ်မာဆလာတို့ကို ထည့်ပြီး အားလုံး သမအောင် နယ်ပေးပါ။ ပြီးရင် ကြက်ဥအကာတွေကိုပါထည့်ပြီး သမအောင် မွှေပေးပြီး နာရီဝက်လောက် နှပ်ထားပေးပါနော်။
အားလုံးအသင့်ဖြစ်ပြီဆိုရင် နယ်နှပ်ထားတဲ့ အသားတွေကို (rice paper) နဲ့ ထုပ်ရမှာဖြစ်ပါတယ်။ rice paper က မာနေတာမို့ အသားနဲ့ မထုပ်ခင်မှာ ရေနဲ့စိမ်ရမှာဖြစ်ပါတယ်။ ပန်းကန်ပြားတစ်ချပ်ထဲကို့  rice paper ထည့်ပြီး အပေါ်ကနေ ရေဖျန်းပေးပါ။ ဒါမှမဟုတ် စုတ်တံလေးနဲ့ ရေကိုဆွတ်ပြီး ဖက်ထုပ်ရွက်ပေါ် ဆွတ်ပေးပါနော်။ အဲ့ဒီအရွက်ပျော့သွားတဲ့အခါ လက်မနဲ့ လက်ညှိုး အဲ့ဒီအရွက်ကိုထည့်ပြီးတော့ အပေါ်ကနေ ၀က်သားကို ဇွန်းလေးနဲ့ ယူပြီး ဖက်ထုပ်ရွက်ရဲ့ အလယ်ထဲကို ဇွန်းလေးနဲ့ အသာလေး ဖိထည့်ပေးပါနော်။ အသားတွေကို အများကြီး မထည့်ရဘူးနော်။ ပြီးတော့မှ အပေါ်ကနေ ဖက်ထုပ်ရွက်လေးတွေကို နှုတ်ခမ်းသပ်လိုက်ပါနော်။ ကိုယ်လိုချင်တဲ့ အထုပ်အရေအတွက် ရအောင်ထုပ်ပါနော်။

အားလုံးအသင့်ဖြစ်ရင် အိုးတစ်အိုးထဲကို ကြက်ရိုးပြုတ်ရည်ထည့်ပြီး ပွက်ပွက်ဆူအောင်တည်ပါ။ အရိုးပြုတ်အိုး ပွက်လာပြီဆိုတာနဲ့ ဖက်ထုပ်လေးတွေကို ထည့်ပြီး အဖုံးမအုပ်ဘဲ ပြုတ်ပေးပါ။ ကိုယ်ထည့်ထားတဲ့ ဖက်ထုပ်အရေအတွက်ပေါ်မူတည်ပြီး အချိန် ၅ မိနစ်ကနေ ၈ မိနစ်လောက်အကြာမှာ ဟင်းအိုးထပ်ပွက်ပြီး ဖက်ထုပ်လေးတွေလည်း နူးလောက်ပါပြီ။ အဲ့ဒီအချိန်ကျရင်တော့ ဖက်ထုပ်ပြုတ်ကို ပန်းကန်ထဲပြောင်းထည့်၊ အပေါ်ကနေ ကြက်သွန်ဖြူကြော်လေးတွေထည့်၊ ကြက်သွန်မြိတ်ဒါမှမဟုတ် တရုတ်နံနံလေးတွေ ဖြူးထည့်၊ ငရုတ်ကောင်းမှုန့်လေးအုပ်ပြီး ပူပူနွေးနွေးချိုချိုအိအိလေးနဲ့ ဖက်ထုပ်ပြုတ်လေးကို သုံးဆောင်နိုင်ပါပြီနော်။
ဒီအတိုင်းစားရင် အီတယ်၊ အချဉ်လေးနဲ့ ဆို ပိုကောင်းမှာပဲလို့ ဆိုတဲ့ မောင်နှမတွေအတွက် အချဉ်စပ်နည်းကတော့ ပဲငံပြာရည်အကျဲ စားပွဲတင်ဇွန်း (၅) ဇွန်း၊ ရှာလကာရည် စားပွဲတင်ဇွန်း (၁) ဇွန်း၊ ခြစ်ထားတဲ့ ချင်း လက်ဘက်ရည်ဇွန်း (၁) ဇွန်း၊ သကြား လက်ဘက်ရည်ဇွန်းတစ်ဝက်တို့နဲ့ အတူရောဖျော်ပြီး ဖက်ထုပ်ပြုတ်နဲ့အတူ တွဲဘက်သုံးဆောင်နိုင်ပါတယ်နော်။

0 comments:

Post a Comment