Thursday, March 20, 2008

ကင်ပွန်းချဉ်ရွက်ကြော်

Reactions: 


ဒီနေ့တော့ ကျွန်မမောင်နှမတွေကို ကင်ပွန်းချဉ်ရွက်ကြော်လေးနဲ့
ကြော်ကျွေးပါရစေနော်။ ကင်ပွန်းချဉ်ရွက်ကြော်ဖို့အတွက်
လိုအပ်တဲ့ပစ္စည်းတွေကတော့ ကင်ပွန်းချဉ်ရွက်၊ ပုစွန်၊ ငရုတ်သီးအပုတောင့်၊
ကြက်သွန်ဖြူ၊ ကြက်သွန်နီ၊ ငါးပိစိမ်းစား၊ ငံပြာရည်၊ ဆား၊ နနွင်းမှုန့်၊
ငရုတ်သီးစိမ်း၊ ဆီတို့ပါနော်။

ကင်ပွန်းချဉ်ရွက်ကို အခိုင်လိုက် ရေဆေးပြီးမှ ဘေးကအခက်လေးတွေကို
အရင်ဦးဆုံး ခြွေလိုက်ပါနော်။ ဆူးလေးတွေကို သတိထားပြီး ခြွေပါနော်။
ပြီးတော့မှ အခက်လေးတွေက အရွက်လေးတွေကို လက်ချောင်းလေးနဲ့ အသာလေး
ခြွေပေးပါနော်။ ပုစွန်အကောင်သေးတွေကို ခေါင်းအခွံမာလေးတွေဖြုတ်၊
မစင်အိတ်ကို ထုတ်ပစ်ပြီး ရေစင်အောင်ဆေးပြီး ဆား၊ နနွင်း၊
အချိုမှုန့်လေးနဲ့ နယ်ပေးထားပါနော်။ ငရုတ်သီးခြောက်အပုတောင့်ကို အညှာခြွေ၊
အစေ့ထုတ်ပြီး ငရုတ်သီးကို ရေနွေးနဲ့ စိမ်ဆေးပေးပြီး ငရုတ်သီးဖတ်တွေကို
ရေစစ်ပေးထားပါ။ ကြက်သွန်ဖြူနီကို အခွံနွှာ၊ ရေဆေးပေးထားပါ။ ငရုတ်ဆုံထဲမှာ
ရေစစ်ထားတဲ့ ငရုတ်သီးကို ထည့်ပြီးထောင်းပါ။ ငရုတ်သီးဖတ် မျက်လုံးထဲ
မစင်ရအောင်လည်း သတိထားပြီးထောင်းပါ။ ငရုတ်သီးညက်ပြီဆိုရင်
ကြက်သွန်ဖြူထည့်ထောင်း၊ ပြီးတော့ ကြက်သွန်နီကိုပါ ထည့်ထောင်းပေးပါ။
ငရုတ်သီးစိမ်းတောင့်ကိုလည်း ရေဆေးပြီး အညှာခြွေပေးထားပါနော်။



အားလုံးအသင့်ဖြစ်ပြီဆိုရင် မီးဖိုပေါ် ဒယ်အိုးတင်၊ ဆီထည့်၊
ဆီပူလာပြီဆိုရင် နနွင်းမှုန့်လေးခပ်၊ ပြီးတော့ ထောင်းထားတဲ့
ငရုတ်သီးကြက်သွန်ထည့်ပြီး ဆီသတ်ပါနော်။ ဆီသတ်နံ့မွှေးလာပြီဆိုရင်
နယ်ထားတဲ့ ပုစွန်တွေထည့်ပြီး ဆီသတ်၊ ပြီးရင် ကင်ပွန်းရွက်တွေထည့်၊ ဆား၊
အချိုမှုန့်၊ ငံပြာရည်နဲ့ ငါးပိစိမ်းစားလေးကို ရေဖျော်ထည့်ပြီး
အားလုံးနှံ့အောင် သေသေချာချာမွှေ၊ အဖုံးအုပ်ပြီး တည်ပေးပါ။ ရေခမ်းခါနီးကျ
ဟင်းအိုးအဖုံးဖွင့်ပြီး အပေါ့အငံအရသာမြည်း၊ လိုတဲ့အရသာထပ်ထည့်ပါနော်။
ပြီးရင်တော့ ငရုတ်သီးစိမ်းလေးတွေ အုပ်ပြီး ဟင်းအိုးချလို့ရပါပြီနော်။
အဲ့ဒါဆိုရင်တော့ ကင်ပွန်းချဉ်ရွက်ကြော်လေးရပါပြီနော်။
ငရုတ်ကောင်းဟင်းခါးလေးနဲ့ တွဲဖက်သုံးဆောင်ပါနော်။

0 comments:

Post a Comment