Tuesday, March 18, 2008

ပဲကြီးဆူးပုတ်



ဒီနေ့တော့ ကျွန်မရဲ့မောင်နှတွေကို သတ်သတ်လွတ် ပဲကြီးဆူးပုတ်ဟင်းလေး
ချက်ကျွေးပါရစေနော်။ အိမ်ရှင်မတွေ ဟင်းချက်ဖို့ စဉ်းစားတဲ့အခါ ပဲကြီးနဲ့
ဆူးပုတ်ရွက်ကတော့ ခွဲလို့မရတဲ့ လိုက်ဖက်လွန်းလှတဲ့ အတွဲဖြစ်ပါတယ်။
ဆူးပုတ်ရွက်ကို အနံ့ဆိုးပေမယ့် ဘယ်လိုအသီးအရွက်နဲ့ ရောရော ကြိုက်တတ်ကြသလို
ဒီအတိုင်းလည်း ပြုတ်တို့ကြပါတယ်နော်။

ပဲကြီးဆူးပုတ်ချက်ဖို့ လိုအပ်တဲ့ပစ္စည်းတွေကတော့ ပဲကြီး၊ ဆူးပုတ်ရွက်၊
ကြက်သွန်ဖြူ၊ ကြက်သွန်နီ၊ ဆား၊ ဆီ၊ နနွင်း၊ အချိုမှုန့်အနည်းငယ်တို့ပါနော်။
ပဲကြီးကို မနက်ချက်မယ်ဆိုရင် ညကတည်းက ပဲကြီးစေ့ကို ရေစိမ်ပေးထားပါ။ မနက်ကျရင်
ပဲကြီးခွံလေးတွေ ပွတက်လာပါလိမ့်မယ်။ မနက်ကျရင်တော့ ပွတက်လာတဲ့ ပဲကြီးစေ့တွေကို
ရေထဲကနေဆယ်ယူပြီး ပဲကြီးစေ့ညှစ်ထုပ်ပေးပါ။ ဆူးပုတ်ရွက်တွေကို မခြွေခင်
အခက်လိုက် အရင်ဆေးပေးပါ။ ပြီးတော့မှ ဆူးပုတ်ရွက် အညွန့်နုလေးတွေကို
ခြွေယူထားပါ။ ကြက်သွန်ဖြူ၊ ကြက်သွန်နီတို့ကို အခွံနွှာ၊ ရေဆေးပြီး
ကြက်သွန်ဖြူကို ဓားပြားရိုက်ထားပေးပြီး ကြက်သွန်နီကို မထူမပါးလေး လှီးပေးထားပါ။

အားလုံးအသင့်ဖြစ်တဲ့အခါ မီးဖိုပေါ် အိုးတစ်လုံးတင်၊ ပြီးရင် ဆီနည်းနည်းလေးထည့်၊
ဆီပူလာရင် နနွင်းမှုန့်လေးခပ်၊ ကြက်သွန်ဖြူ ကြက်သွန်နီကိုထည့်ပြီး ဆီသတ်၊
ကြက်သွန်နည်းနည်းနွမ်းတာနဲ့ ပဲကြီးစေ့တွေကိုထည့်ပြီး ဆီသတ်လိုက်၊ ပြီးတော့မှ
ရေထည့်၊ ဆား၊ အချိုမှုန့်နည်းနည်းထည့်ပြီး ပဲကြီးနူးတဲ့အထိ တည်ပေးပါ။
ပဲကြီးနူးလာပြီဆိုရင်တော့ ဆူးပုတ်ရွက်ညွန့်လေးတွေ ခပ်ပြီး နောက်တစ်ကြိမ်
ပွက်ပွက်ပေးဆူလိုက်ပါ။ ဟင်းအိုးဆူလာရင်တော့ အပေါ့အငံအရသာမြည်းပြီး
ကိုယ့်စိတ်ကြိုက်ဖြစ်ပြီဆိုရင်တော့ ဟင်းအိုး ချလို့ရပါပြီနော်။

ပဲကြီးဆူးပုတ်ဟင်းနဲ့ လိုက်ဖက်တာတွေကတော့ သရက်ချဉ်သုပ်၊ မရမ်းသီးသုပ် စတဲ့
အချဉ်သုပ်၊ ဒါမှမဟုတ် မုန်လာဥပိုးတီ၊ ပဲတီချဉ်၊ သခွါးချဉ်တို့ပါနော်။
အိမ်ရှင်မတို့ရေ့့့  အဆင်ပြေမယ်ဆိုရင်တော့ ပဲကြီးဆူးပုပ်ဟင်းလေးလည်း
ချက်စားကြည့်ကြပါဦးနော့့် 

2 comments:

  1. i wanna eat that one..very much..these days,,thanks for ur post mama lulu,,even i can't eat in reality,i can still see on ur page!!!

    ReplyDelete
  2. အစ်မရေ ကျွန်တော် သိပ်ကြိုက်တဲ့ဟင်းဗျ။ ကျေးဇူးဗျာ။ ပုံလေးမြင်ရတာနဲ့တင် စားချင်တဲ့ အလွမ်းဖြေရတယ်။ မစားရတာ ကြာပြီဗျိူ့။

    ReplyDelete