Sunday, February 24, 2008

ဂေါ်ဖီဟင်းခါး

Reactions: 
ဒီနေ့တော့ ကျွန်မမောင်နှမတွေကို မြန်လွယ်ကောင်းဟင်းချိုချက်နည်းလေးနဲ့ ဂေါ်ဖီဟင်းချိုလေး ချက်ကျွေးပါရစေနော်။ ဟင်းချိုကိုတော့ ထမင်းနဲ့စားတဲ့အခါပဲဖြစ်ဖြစ်၊ အသုပ်တွေ သုပ်စားတဲ့အခါမှာပဲဖြစ်ဖြစ် ဟင်းချိုဟင်းခါးလေးနဲ့ တွဲဖက်စားသုံးကြတာ အကျင့်တစ်ခုပါပဲနော်။
ဂေါ်ဖီဟင်းခါးချက်ဖို့အတွက် လိုအပ်တာတွေကတော့ ဂေါ်ဖီထုပ်၊ ပဲကြာဇံအနည်းငယ်၊ ကြက်ရိုး သို့မဟုတ် ပုစွန်ခြောက်၊ ဆား၊ သကြားအနည်းငယ်၊ ပဲငံပြာရည်အကျဲ၊ တရုတ်နံနံ၊ ကြက်သွန်ဖြူ၊ ချင်းနဲ့ ငရုတ်ကောင်းအနည်းငယ်တို့ပါနော်။






ပထမဦးဆုံးမှာ ကြက်ရိုးကို ခုတ်ထစ်ဆေးကြောပြီး ဆား၊ သကြားအနည်းငယ်၊ ပဲငံပြာရည်အကျဲတို့နဲ့ နယ်ပေးပါနော်။ ချင်းနဲ့ ကြက်သွန်ဖြူကိုအခွံနွှာပေးထားပါ။ ချင်းကိုရေဆေးပြီး ခပ်ပါးပါးမျှင်မျှင်လေးတွေ ဖြစ်အောင် လှီးပေးပါ။ ပဲကြာဇံကိုလည်း ရေစိမ်ပေးထားပါ။ ဂေါ်ဖီဖတ်တွေကို တစ်ဖတ်ချင်းခွါပြီး ပိုးသတ်ဆေးကြွင်းအာနိသင်ကင်းအောင် ဆားရည်နဲ့ နာရီဝက်လောက်စိမ်ပေးပါ။ ပြီးတော့မှ ရေနဲ့တစ်ခါထပ်ဆေးပြီးတော့မှ ဂေါ်ဖီဖတ်တွေကို ခပ်ကြီးကြီးလေး ဖဲ့ထားပေးပါ။ တရုတ်နံနံကိုလည်း ရေဆေးပြီး ခပ်ရှည်ရှည်လေးဖြတ်ထားပေးပါ။
အဆင်သင့်ဖြစ်ပြီဆိုရင် အိုးတစ်လုံးထဲ ကြက်ရိုးတွေထည့်၊ ပြီးရင် လှီးထားတဲ့ ချင်းကိုထည့်၊ ပြီးတော့ ဆား၊ သကြားလေးနဲ့ ပဲငံပြာရည်အကျဲလေးနည်းနည်းထည့်ပြီး ပွက်ပွက်ဆူအောင်တည်ပါနော်။ ဟင်းရည်အိုး ပွက်ပွက်ဆူလာတဲ့အခါ ငရုတ်ကောင်းစေ့လေးတွေကို ငရုတ်ဆုံထဲ ထည့်ထောင်း၊ ပြီးတာနဲ့ ကြက်သွန်ဖြူကိုပါ မညက်တညက်လေးထည့်ထောင်းပြီး ငရုတ်ကောင်းကြက်သွန်ဖြူထောင်းကို ပွက်ပွက်ဆူတဲ့ဟင်းရည်အိုးထဲ ထည့်ပေးပါနော်။ ဟင်းရည်နည်းနည်းကျသွားအောင်ရော၊ ကြက်ရိုးထဲက အချုိုရည်ထွက်လာအောင်ရော ခပ်ကြာကြာလေးတည်ပေးပါ။ ငရုတ်ကောင်းဟင်းခါးနံ့လေးမွှေးလာပြီ ကြက်ရိုးလည်းနူးလောက်ပြီဆိုရင်တော့ ကြာဇံနဲ့ ဂေါ်ဖီဖတ်တွေကိုထည့်ပြီး ဟင်းရည်အိုးကို နောက်ထပ်ပေးဆူလိုက်ပါနော်။ ဟင်းရည်အိုးဆူတာနဲ့ အပေါ့အငံမြည်း၊ လိုတဲ့အရသာလေးထည့်၊ စိတ်ကြိုက်ဖြစ်ပြီဆိုရင် တရုတ်နံနံလေးထည့်ပြီး ဟင်းအိုးချလိုက်ရုံပါပဲနော်။

0 comments:

Post a Comment