Friday, February 8, 2008

မရမ်းသီးသုပ်


ညက အကယ်ဒမီပေးပွဲကြည့်တာမို့ မောင်နှမတတွေ အိပ်ချင်ပြေအောင် မရမ်းသီးသုပ်လေး သုပ်ပြီး ရေနွေးကြမ်းနဲ့ လွေးခဲ့ကြပါတယ်။ ကျွန်မရဲ့ ချစ်မောင်နှမတွေကိုလည်း မရမ်းသီးသုပ်လေး မျှဝေပေးလိုက်ပါတယ်နော်။
မရမ်းသီးသုပ်ဖို့အတွက် လိုအပ်တဲ့ပစ္စည်းလေးတွေကတော့ မရမ်းသီးအစိမ်း၊ ဂေါ်ဖီထုပ်၊ ကြက်သွန်နီ၊ ပဲမှုန့်အကျက်မှုန့်၊ ငရုတ်သီးအလှော်မှုန့်၊ မြေပဲထောင်း၊ ဆီချက်၊ ငံပြာရည်၊ ငါးပိစိမ်းစား၊ ပုဇွန်ခြောက်မှုန့်နဲ့ အချိုမှုန့် အနည်းငယ်တို့ပါနော်။







မရမ်းသီးကို ရေဆေး၊ ထက်ခြမ်းခွဲပြီး အထဲက အစေ့ကို ထုတ်ပစ်ပါ။ မရမ်းသီးက အထဲက အစေ့မယှက်သေးတာမို့ ဒီအတိုင်း အလွယ်တကူ ခပ်ပါးပါးလှီးလိုက်ရုံပါပဲ။ အစေ့ယှက်ခဲ့ပြီဆိုရင်တော့ မရမ်းသီးအသားနဲ့ ကပ်လျက်ရှိနေတဲ့ အခွံကို ဖယ်ထုတ်ပစ်ပြီးမှ ပါးပါးလှီးပါနော်။ ဂေါ်ဖီထုပ်ကို အဖတ်ခွါ၊ ရေဆေးပြီး ခပ်ပါးပါးလေးလှီးပေးပါ။ ကြက်သွန်နီကို အခွံနွှာ၊ ရေဆေးပြီး ပါးပါးလှီးပါ။ အခိုးမမွှန်အောင် လှီးပြီးသား ကြက်သွန်ကို ရေပြန်ဆေးပေးပြီး ရေစင်အောင် ညှစ်ပေးပါ။ မြေပဲလှော်ကို ငရုတ်ဆုံထဲထည့်ပြီး မညက်တညက်လေး ထောင်းပေးပါ။ ပုဇွန်ခြောက်ကိုလည်း ထောင်းပေးပါနော်။ ဆီချက်ကတော့ အသင့်ရှိပြီးသားမို့ မချက်နေတော့ဘူးနော်။ ငါးပိစိမ်းစားကိုတော့ မီးနည်းနည်းအုံးပေးပါ။ မီးအုံးဖို့ အဆင်မပြေခဲ့ရင် ဒယ်အိုးထဲ ဆီထည့်ပြီး ဆီလေးနဲ့ လှိမ့်ပေးပါ။
အားလုံးအသင့်ဖြစ်ပြီဆိုရင်တော့ ဇလုံတစ်လုံးထဲ လှီးထားတဲ့ မရမ်းသီး၊ ဂေါ်ဖီ၊ ကြက်သွန်နီတို့ကိုထည့်၊ ပြီးရင် ထောင်းထားတဲ့ မြေပဲ၊ ပုဇွန်ခြောက်၊ ငါးပိစိမ်းစားအနည်းငယ်၊ ငံပြာရည်အနည်းငယ်၊ အချိုမှုန့်အနည်းငယ်၊ ဆီချက်၊ ပဲမှုန့်နဲ့ ငရုတ်သီးမှုန့်တို့ကိုထည့်ပြီး သေချာနှံ့အောင် နယ်ပေးပါနော်။ ပြီးတော့မှ အပေါ့အငံကိုမြည်းပြီး ကိုယ်နှစ်သက်တဲ့အရသာကို ပိုကဲထည့်ပေးပါ။ ပြီးရင် ပန်းကန်ပြားလေးထဲ ထည့်ပြီး အပေါ်ကနေ ကြက်သွန်ဖြူကြော်လေး ဖြူးလိုက်ပါနော်။ အဲ့ဒါဆိုရင်တော့ ချဉ်ငံစပ်အရသာလေးနဲ့ မရမ်းသီးသုပ်လေးရပါပြီ။

1 comment:

  1. သွားကြိမ်းလိုက်တာ ဖိုးဖိုးတို့ ဖွားဖွားတို့  မစားနိုင်ဘူး ကလေးမရေ

    ReplyDelete