သတ်သတ်လွတ်ဟင်းတွေချည်း ဆက်နေတော့ ကျွန်မမောင်နှမတွေလည်း ငြီးငွေ့နေလောက်ရောပေါ့။ ဒါကြောင့်မို့ ဒီနေ့မှာ ကျွန်မရဲ့ မောင်နှမတွေကို ငါးခူကို သံပုရာရည်ဆမ်းပြီး ငရုတ်သီးစိမ်းလေးနဲ့ ချဉ်ချဉ်စပ်စပ်လေး ချက်ကျွေးပါမယ်နော်။
အခု ငါးခူသံပုရာရည်ဆမ်းအစပ်ချက်ဖို့ လိုအပ်တဲ့ပစ္စည်းတွေကို ပြောပါ့မယ်နော်။ ငါးခူ၊ ကြက်သွန်ဖြူ၊ ကြက်သွန်နီ၊ ငရုတ်သီးအပုတောင့်အပွ၊ စပါးလင်၊ ချင်း၊ ငရုတ်သီးစိမ်း (ကုလားအော်သီး)၊ သံပုရာသီး၊ ပင်စိမ်း၊ ဆား၊ သကြားအနည်းငယ်၊ ငံပြာရည်၊ နနွင်းမှုန့်အနည်းငယ်နဲ့ ဆီတို့ပါ။
ငါးခူကို အင်္ဂလိပ်လို cat fish လို့ခေါ်ပါတယ်။ ငါးခူက အကြေးခွံမပါတဲ့ ငါးမျိုးပါ။ အရေခွံမည်းမည်း ပြောင်ချောချောနဲ့ နှုတ်ခမ်းမွှေးကားကားနဲ့ ငါးပါ။ အကြေးခွံမပါတဲ့အတွက် အကြေးထိုးရ သက်သာပေမယ့် ငါးအရေခွံက ချွဲကျိနေတာမို့ ဆေးကြောတဲ့အခါမှာ အချွဲတွေကုန်အောင် တော်တော်လေး ဂရုတစိုက်နဲ့ ဆေးကြောရပါတယ်။
ငါးခူကို သန့်ရှင်းရေးလုပ်တဲ့အခါမှာ နှုတ်ခမ်းမွှေးတွေကို အရင်ခုတ်ပစ်ပါတယ်။ ပြီးတော့မှ ငါးခူကိုယ်လုံးကို မန်ကျည်းသီးမှည့်နဲ့ ဆားနဲ့နယ်ပြီး အကျိအချွဲတွေကုန်အောင် ခပ်နာနာလေး တိုက်ဆေးပစ်ရပါတယ်။ ပြီးတော့မှ ငါးခူကို ပက်လက်လှန်ပြီး လည်ပင်းဘက်ကနေ လှီးပြီး ၀မ်းဗိုက်ထဲက အူနဲ့ကလီစာတွေကို ထုပ်ယူပစ်ပါ။ ခေါင်းဘက်ကနေပြီး ပါးဟက်ကို ဆွဲထုတ်ပစ်ပြီး အကျိအချွဲတွေကုန်စင်အောင် ဖယ်ရှားပစ်ပါ။ ဘေးနားက ဆူးတောင်တွေကို ခုတ်ထစ်ပစ်ပါ။ ပြီးတော့မှ ငါးခူကိုယ်လုံးကို အကွင်းလိုက်လေးတွေ လှီးပါ။ သံပုရာသီးကိုလည်း အရည်ညှစ်ပေးထားပါ။ ပြီးရင် ငါးခူကို ဆား၊ သကြား၊ ငံပြာရည်၊သံပုရာရည်၊ နနွင်းမှုန့်၊ အချိုမှုန့်တို့နဲ့ သေသေချာချာနှံ့အောင် နယ်ပြီး နှပ်ထားပေးပါ။
ငရုတ်သီးအပုတောင့်ကို အညှာခြွေ၊ အစေ့ထုတ်ပြီး ကပ်ကြေးလေးနဲ့ အသာညှပ်ပြီး ရေနွေးလေးနဲ့ စိမ်ထားပေးပါ။ ကြက်သွန်ဖြူနဲ့ ကြက်သွန်နီကို အခွံနွှာ၊ ရေဆေးပြီး ငရုတ်သီးထဲ ထည့်ထောင်းလို့ရအောင် မထူမပါးလေး လှီးပေးထားပါ။ ချင်းကိုလည်း အခွံနွှာရေဆေးပြီး လှီးပေးထားပါ။ ပြီးတော့မှ ရေထဲကနေ ဆယ်၊ ရေစင်အောင်ညှစ်ထုတ်ပစ်ပြီး ငရုတ်ဆုံထဲ ထည့်ထောင်းပေးပါ။ ငရုတ်သီးညက်တာနဲ့ ချင်းထည့်ပြီးထောင်းပါ။ ပြီးရင် စပါးလင်ကို ရေဆေးပြီး ပါးပါးလှီးပြီး ငရုတ်ဆုံထဲ ရောထည့်ထောင်းပါနော်။ ပြီးတော့မှ ကုလားအော်သီးသုံးတောင့်ကိုကို ခပ်ပါးပါးလှီးပြီး ထည့်ထောင်းပေးပါ။ ပြီးတော့မှ ကြက်သွန်ဖြူနဲ့ အနီကို ထည့်ထောင်းပေးပါနော်။ ပင်စိမ်းရွက်ကိုလည်း ရေဆေးပြီး အရွက်လေးတွေအခက်လိုက်ဖြစ်အောင် ချွေပေးထားပါနော်။
အားလုံးအသင့်ဖြစ်ပြီဆိုတာနဲ့ မီးဖိုပေါ် ဒယ်အိုးတင်၊ ဆီထည့်၊ ဆီပူလာပြီဆိုရင် နနွင်းမှုန့်လေး အသာခပ်ပြီး ထောင်းထားတဲ့ ငရုတ်သီးကို ထည့်ပြီး မီးအသင့်အတင့်နဲ့ ဆီသတ်ပါနော်။ ငရုတ်သီးဆီသတ်တဲ့အခါ ညှော်မမိအောင် သတိထားပြီး ဆီသတ်ပါနော်။ ဆီသတ်နံ့မွှေးလာတဲ့အခါ နယ်နှပ်ထားတဲ့ ငါးတွေကို စီစီရီရီထည့်ပြီး ငရုတ်သီးဆီသတ်နဲ့အတူ သမအောင် မွှေပေးပါ။ လုံးရေလည်း နည်းနည်းထည့်ပြီး မီးအသင့်အတင့်နဲ့ပဲ ဒယ်အိုးအဖုံးအုပ်ပြီး တည်ပေးပါ။ ဟင်းအိုးဖျစ်ဖျစ်မြည်ပြီး ဆီပြန်လာတဲ့အခါ ရေလေးနည်းနည်းထပ်ထည့်ပြီး အဖုံးအုပ်ပြီး ရေခမ်းပြီး ဆီပြန်တဲ့အထိ တည်ပေးပါနော်။ ဆီပြန်ခါနီးကျရင် ဟင်းအိုးအပေါ့အငံကိုမြည်းပြီး ချဉ်ချဉ်လေးကြိုက်ရင် သံပုရာရည်ထပ်ထည့်ပေးပါ။ အရသာ စိတ်ကြိုက်ဖြစ်ပြီဆိုတော့မှ ပင်စိမ်းလေး အပေါ်ကနေ အုပ်ပြီး ဟင်းအိုးချနိုင်ပါပြီနော်။ အဲ့ဒါဆိုရင်တော့ ငါးခူသံပုရာရည်ဆမ်းအစပ်ချက်လေး ရပါပြီနော်။
ကျနော့် ဆိုဒ်ထဲမှာ နှတ်ခမ်းမွှေးနဲ့  အကောင်အကြောင်း ရေးထားသေးတယ် သူ့ ကိုမြင်တိုင်း ဂလု ဂလုနဲ့  ဒီမှာ မ၀ယ်နိုင်ဘူး ဈေးကြီးလို့  မျက်လုံးဘဲ ဆုံထားတယ်
ReplyDelete