ညီမလေးသိမ့်က အဆာပြေစားစရာလေးတွေ ရေးပေးပါဦးဆိုလို့ ကောက်ညှင်းထုပ်လုပ်နည်းလေးကို တင်ပေးလိုက်ပါတယ်နော်။ ကောက်ညှင်းထုပ်ကို ငှက်ပျောသီးနဲ့ ထုပ်ကြသလို ပဲနဲ့လည်း ထုပ်ကြပါတယ်။ကောက်ညှင်းထုပ်ကို ငှက်ပျောဖက်၊ အင်ဖက်၊ ထန်းရွက်၊ ပေရွက်၊ ဆလူရွက်တို့နဲ့လည်း ထုပ်ကြပါတယ်။
ကောက်ညှင်းထုပ်ထုပ်ဖို့အတွက် လိုအပ်တာတွေကတော့ ကောက်ညှင်း၊ ငှက်ပျောသီး၊ ပဲလွန်းအနည်းငယ်၊ အုန်းသီး၊ နှမ်းလှော်နဲ့ ဆားအနည်းငယ်တို့ပါနော်။ ငှက်ပျောဖက်နဲ့ ချည်နှောင်ဖို့အတွက် နှီးကြိုးလိုပါတယ်။ (အဲ့့့ ပြောရင်းနဲ့ ကောင်မလေးတွေ အ၀တ်အစား ကိုယ်ကျပ်တွေ ၀တ်ထားရင် ကောက်ညှင်းထုပ်လိုပဲလို့ ပြောကြတာကို သတိရသွားတယ့့့် 
ကောက်ညှင်းကို ရေနဲ့ သေချာစင်အောင်ဆေးထားပြီးတော့ အနည်းဆုံး (၄) နာရီလောက်ရေစိမ်ထားပေးပါ။ ငှက်ပျောသီးကိုလည်း အခွံနွှာထားပြီး အလယ်ကနေ ထက်ခြမ်းခွဲထားပေးပါနော်။ ပဲလွန်းကိုလည်း ရေစိမ်ထားပါ။ ငှက်ပျောဖက်ကို သုံးပြီး ထုပ်မယ်လို့ ရည်ရွယ်ထားရင်လည်း ငှက်ပျောဖတ်တွေကို သန့်စင်အောင် ဆေးပြီး ရေခြောက်အောင်သုပ်ပါ။ ပြီးတော့မှ လက်ကိုင်ပုဝါအရွယ်လောက်ဖြစ်အောင် ဖြတ်ထားပေးပါ။
အားလုံးအသင့်ဖြစ်ပြီဆိုရင်တော့ ငှက်ပျောဖက်ထဲမှာ ကောက်ညှင်းကို ထည့်ပါ။ ပြီးတော့မှ ခွဲထားတဲ့ ငှက်ပျောသီးကို အလယ်မှာထည့်ပြီး သေချာလုံအောင် ဖက်ကို ထုပ်ပေးပါ။ ခပ်ကြပ်ကြပ် ခပ်တင်းတင်းလေးဖြစ်အောင် ထုပ်ပြီး နှီးကြိုးနဲ့ စည်းပေးပါနော်။ ပဲလွန်းနဲ့ ထုပ်မယ့် ကောက်ညှင်းထုပ်ဆိုရင်တော့ ပဲနဲ့ ကောက်ညှင်းကို ရောသမမွှေပြီးတော့မှ ငှက်ပျောဖက်ထဲထည့်ပြီး ကျစ်ကျစ်လျစ်လျစ်လေး ထုပ်၊ ကြိုးနဲ့စည်းပေးပါနော်။
ပြီးတော့မှ ကောက်ညှင်းထုပ်တွေကို အိုးတစ်လုံးထဲ တန်းစီထည့်၊ ရေထည့်ပြီး မီးဖိုပေါ်တင်ကာ ပြုတ်ပါ။ ပထမ တစ်ရေ ပွက်ပွက်ဆူရင် အဲ့ဒီရေတွေကို သွန်ပြီး ရေအသစ်ထည့်ပြီး တည်ပေးပါ။ အဲ့ဒီလိုနဲ့ သုံးကြိမ်ထက်မနည်း ပွက်ရေ သွန်လိုက်၊ ရေအသစ်နဲ့ပေးဆူရင်းနဲ့ လေးကြိမ်မြောက်မှာတော့ မီးလျော့ပြီး ကောက်ညှင်းထုပ်အိုးကို တည်ပေးပါနော်။ တချို့ကလည်း လေးကြိမ်မြောက် ဆူပြီးတာနဲ့ ရေနွေးအိုးထဲက ကောက်ညှင်းထုပ်တွေကို ဆယ်ယူပြီး ပေါင်းချောင်ထဲထည့်ပြီး အောက်က ရေနွေးငွေ့နဲ့ ထပ်ပြီး နှပ်ထားတတ်ပါတယ်။ အဲ့ဒါဆိုရင်တော့ ကောက်ညှင်းသား ပိုနူးနပ်ပြီး ငှက်ပျောသီးကလည်းချိုချိုအိအိလေးနဲ့မို့ ပိုပြီး စားကောင်းပါတယ်။ ပဲကောက်ညှင်းထုပ်လည်း ပိုပြီး နူးအိပြီး စားလို့ကောင်းပါတယ်။ ငှက်ပျောဖက်နံ့ မွှေးမွှေးလေးနဲ့ ကောက်ညှင်းထုပ်ချိုချိုအိအိဆိမ့်ဆိမ့်လေးပါနော်။
နှမ်းလှော်ကို ငရုတ်ဆုံထဲထည့်ပြီး ဆားလေးနည်းနည်းထည့်ပြီး မညက်တညက်ထောင်းပေးပါ။ အုန်းသီးခြစ်ထားပေးပါနော်။
ပြီးရင်တော့ ကောက်ညှင်းထုပ် ပူပူနွေးနွေးလေးကို ငှက်ပျောဖက်တွေနွှာပြီး အရွယ်တော် အတုံးလေးတွေဖြစ်အောင် လှီး၊ အပေါ်ကနေ ခြစ်ထားတဲ့အုန်းသီးလေးနဲ့ နှမ်းလေးကို ဖြူးလိုက်ပါ။ ဒါဆိုရင်တော့ အနံ့အရသာနဲ့ ပြည့်စုံလှတဲ့ ငှက်ပျောသီးကောက်ညှင်းထုပ်နဲ့ ပဲကောက်ညှင်းထုပ်ရပါပြီနော်။ အားပေးကြပါဦးနော်။
0 comments:
Post a Comment