Thursday, August 30, 2007

ကြက်သားကျောက်ပွင့်သုပ်

Reactions: 


မိုးကလဲ တစိမ့်စိမ်းနဲ့၊ ခေါင်းထဲက တအုံအုံနဲ့ နေရခက်လိုက်တာ။ ခံတွင်းပျက်နေတာမို့
တခြားဟင်းတွေလဲ မစားချင်၊ အဲ့ဒါနဲ့ပဲ ကျောက်ပွင့်သုပ်လေးနဲ့ ဟင်းခါးလေး လုပ်စားမယ်လို့
ဆုံးဖြတ်လိုက်တယ်။
လိုအပ်တဲ့ပစ္စည်းတွေကတော့ ကျောက်ပွင့်၊ ကြက်သားရင်အုံသား (ကိုယ်နှစ်သက်တဲ့ အသား
ထည့်လို့ရပါတယ်။ ပုဇွန်၊ ပြည်ကြီးငါးတို့နဲ့လဲ သုပ်လို့ရပါတယ်)၊ ကြက်သွန်ဖြူ၊ နီ၊ ဂျင်း၊
ငရုတ်သီးစိမ်း၊ ဂေါ်ဖီထုပ်၊ မုန်လာဥနီ၊ ခရမ်းချဉ်သီး၊ သံပုရာသီး၊ ဆား၊ အချိုမှုန့်၊ ငံပြာရည်၊
သကြား၊ ငရုတ်သီးအလှော်မှုန့် စတာတွေပဲ ဖြစ်ပါတယ်။
ကျောက်ပွင့်ကိုလည်း ရေနွေးနဲ့ ၁၀ မိနစ်လောက် စိမ်ထားလိုက်ပါတယ်။ ကြက်သားကိုလဲ
ရေစပ်စပ်လေးနဲ့ ဆား၊ သကြား၊ ငံပြာရည်၊ အချိုမှုန့်၊ သကြားလေး နည်းနည်းထည့်ပြီးပြုတ်ထား
လိုက်ပါတယ်။ ပြီးတော့ ကြက်သွန်ဖြူ၊ နီကို ပါးပါးလှီးထားလိုက်တယ်။ ငရုတ်သီးတောင့်ကို
အညှာချွေပြီး ကြက်သွန်ဖြူနဲ့ ရောပြီး မညက်တညက်လေး ထောင်းထားလိုက်ပါတယ်။
ကြက်သားပြုတ် ရပြီဆိုရင်တော့ ကြက်သားတွေကို ဆယ်၊ ပြီးတော့ အအေးခံပြီး အမျှင်လေး
တွေဖြစ်အောင် မွှာပါ။ ကျောက်ပွင့်ကိုလည်း အနေတော်အရွယ်လေးတွေ ဖြစ်အောင် ဖဲ့ပါ။
ခရမ်းချဉ်သီး မထူးမပါး လှီးထားပါ။ မုန်လာဥနီကို ပါးပါးလေးတွေဖြစ်အောင် လှီးပါ။
အားလုံးအသင့်ဖြစ်ပြီဆိုရင်တော့ ကျောက်ပွင့်၊ ကြက်သား၊ ကြက်သွန်နီ၊ ကြက်သွန်ဖြူနဲ့
ငရုတ်သီးစိမ်းထောင်း၊ မုန်လာဥနီ၊ ဆား၊ သကြား၊ ငံပြာရည်၊ ဟင်းချိုမှုန့်အနည်းငယ်၊
ငရုတ်သီးအလှော်မှုန့် အားလုံးကိုထည့်၊ သံပုရာရည်လေး ညှစ်ထည့်ပြီးတော့ သေချာ
သမအောင် မွှေပေးပါ။ အရသာက ချိုချဉ်ငံစပ်လေးပါ။ ကိုယ်နှစ်သက်တဲ့အရသာဘက်ကို
ကဲပြီးထည့်နော်။ ပြီးရင်တော့ ပန်းကန်ပြားလေးထဲ သေချာထည့်၊ ပြီးတော့မှ အပေါ်က
ကြက်သွန်ကြော်လေးဖြူး၊ ဘေးကနေ ခရမ်းချဉ်သီးလေးတွေ ထည့်လိုက်တော့ ချိုချဉ်
ငံစပ်အရသာနဲ့ ပြည့်စုံလှတဲ့ ကြက်သားကျောက်ပွ့် သုပ်လေး ရပြီပေါ့။
ကြက်သားပြုတ်ရည်လေးထဲကိုလဲ ကြက်သားနည်းနည်းထည့်၊ ပြီးတော့ ရေထပ်ထည့်၊
လိုတဲ့အရသာထည့်၊ ပြီးတော့ ဂျင်း ကြက်သွန်ဖြူ မညက်တညက်ထောင်းလေး ထည့်ပြီး
ပွက်ပွက်ပေးဆူပါနော်။ ဟင်းအိုးဆူလာရင်တော့ ငရုတ်ကောင်းမှုန့်လေးခပ်၊ ပြီးတော့
ဂေါ်ဖီဖတ်လေး ခပ်ပြီး ဆူအောင်တည်၊ ဆူလာပြီဆိုရင်တော့ အရသာ အပေါ့အငံမြည်းပြီးတော့
ချလို့ရပါပြီ။ ဂေါ်ဖီ ငရုတ်ကောင်းဟင်းခါးလေးနဲ့ ကြက်သားကျောက်ပွင့်သုပ်လေးပါ။
စားပြီးတော့ ချွေးတွေထွက်လို့ လူလည်း နေလို့ ကောင်းသွားတော့တယ်။

0 comments:

Post a Comment