Sunday, March 16, 2008

ခေါပုတ်လုပ်စားရအောင်

Reactions: 


ဒီနေ့တော့ ကျွန်မမောင်နှမတွေကို ကိုယ်တိုင်အလွယ်တကူလုပ်စားလို့ရနိုင်တဲ့
ရှမ်းအစားအစာထဲက တစ်မျိုးဖြစ်တဲ့ ခေါပုတ်လုပ်နည်းလေးကို မျှဝေပါရစေနော်။
ခေါပုတ်လုပ်ဖို့အတွက် လိုအပ်တဲ့ပစ္စည်းအမယ်ကလည်း မများပါဘူး။
ကောက်ညှင်းအဖြူ၊ ကောက်ညှင်းငချိတ်၊ ဆီ၊ နှမ်း၊ ဆားတို့ပါ။
ခေါပုတ်အဖြူကြိုက်ရင် ကောက်ညှင်းဆန်အဖြူကိုသုံးရမှာဖြစ်ပြီး
ခပ်ပျော့ပျော့အိအိမွှေးမွှေးလေးကို ကြိုက်တယ် ဆိုရင်တော့
ကောက်ညှင်းငချိတ်ကို သုံးရပါမယ်နော်။ ကောက်ညှင်းဆန်ကို သန့်စင်အောင်
ရေဆေးပြီး အပေါ်ကနေ ရေလက်တစ်ဆစ်လောက်ထည့်ပြီး rice cooker နဲ့ ချက်ပါ။
ကောက်ညှင်းကို ကျက်အောင်ချက်ပြီးတဲ့အခါမှာတော့
အဲ့ဒီကောက်ညှင်းပူပူနွေးနွေးလေးတွေကို သစ်သားငရုတ်ဆုံနဲ့ အထက်အောက်
ညီညီမျှမျှ ညက်အောင် ထောင်းပေးပါ။ ငရုတ်ဆုံမရှိခဲ့ရင်
ကြိတ်စက်နဲ့ကြိတ်ပေးပါနော်။ ထောင်းလို့ညက်ပြီးသား ကောက်ညှင်းတွေကို
ဗန်းထဲမှာ ညီအောင်ထည့်တဲ့အခါမှာ ကောက်ညှင်းတွေ လက်မှာနဲ့ ဗန်းမှာ
ကပ်မနေရအောင် ဗန်းကိုလည်း နှမ်းဆီလေးသုပ်ပေးရသလို လက်မှာလည်း
နှမ်းဆီလေးဆွတ်ပြီး ကိုင်ရင် ပိုအဆင်ပြေပါတယ်နော်။


နှမ်းကိုလည်း အမှိုက်သန့်စင်အောင် ဖယ်ရှားပြီးတော့မှ နှမ်းကို လှော်ပေးပါ။
လှော်ပြီးသားနှမ်းကိုမှ ငရုတ်ဆုံထဲထည့်ပြီး ဆားလေးဖြူးကာ
ထည့်ထောင်းပေးပါ။ ပြီးရင်တော့ ဗန်းထဲထည့်ထားတဲ့ ကောက်ညှင်းရဲ့ အပေါ်မှာမှ
နှမ်းထောင်းလေး နည်းနည်းဖြူးပေးပြီး ကျန်တဲ့ နှမ်းထောင်းကိုတော့
ခေါပုတ်ကြော် ဒါမှမဟုတ် ကင်ပြီးတဲ့အခါ တို့စား နယ်စားဖို့
ပန်းကန်လုံးလေးထဲ သီးသန့်ဖယ်ထားပေးပါနော်။
ရလာတဲ့ ခေါပုတ်ကိုမှ ကင်တာကြိုက်နှစ်သက်ရင် ကင်စားနိုင်ပြီး ကြော်တာ
ကြိုက်နှစ်သက်ရင် ကြော်စားပါနော်။ လတ်လတ်ဆတ်ဆတ်ကို ကင်စားရတဲ့အခါ
အရသာပိုရှိပြီး ခေါပုတ်ကို သိမ်းထားတဲ့ရက် နည်းနည်းကြာ သွားရင်တော့
ကြော်စားပါနော်။ ချမ်းအေးတဲ့ မနက်ခင်းတွေမှာ
ခေါပုတ်ကင်ပူပူနွေးနွေးလေးကို ရေနွေးကြမ်းလေးနဲ့ တွဲဖက်ပြီး
စားလိုက်ရရင်ဖြင့် အရမ်းကို အရသာရှိတာနော်။
ခေါပုတ်ကြော်/ ကင်ကို နှမ်းထောင်းနဲ့ စားလို့ရသလို
စားတော်ပဲပြုတ်ဆီဆမ်းနဲ့လည်း စားလို့ရပါတယ်။ ကျွန်မကတော့
ပဲပြုတ်ဆီဆမ်းနဲ့ နယ်စားရင် အီလို့ နှမ်းထောင်းလေးနဲ့ နယ်စားတာ
ပိုကြိုက်ပါတယ်။ ပိုလည်း စားဝင်ပါတယ်။ တချို့တွေမှာတော့
ကြက်ချဉ်စပ်ဟင်းနဲ့ ခေါပုတ်ကင်တွဲဖက်စားတတ်သလို သင်္ဘောသီးထောင်းနဲ့ လည်း
တွဲဖက်စားတတ်ပါသေးကြောင်း မျှဝေလိုက်ရပါတယ်နော်။

1 comment: