Thursday, October 18, 2007

ငါးရှဥ့်ခြောက်စပ်ကြော်

Reactions: 

ချစ်မောင်နှမတွေ ဟင်းမကြိုက်လို့ ထမင်းဖြူချည်းစားမယ်များ စိတ်ကူးနေပြီလား။
ခဏကလေးစောင့်ပါနော်။ ခံတွင်းကောင်းသွားအောင် ငါးရှဉ့်ခြောက်စပ်ကြော်ကလေး
လုပ်ကျွေးပါရစေဦး။ ရေနွေးကြမ်းလေးနဲ့ သောက်လိုက်ရင် အဆာပြေနိုင်ပါတယ်။
ပြန်ဆာလာတဲ့အခါကျရင်တော့ ကင်ပွန်းချဉ်ရွက်လေးနဲ့ချက်ထားတာ ထမင်းနဲ့စားနော်။
လိုအပ်တဲ့ပစ္စည်းတွေကတော့ ငါးရှည့်ကြပ်တင်ရယ်၊ ကင်ပွန်းချဉ်ရွက်၊
ငရုတ်သီးအခြောက်တောင့်ရယ်၊ ကြက်သွန်ဖြူ၊ ကြက်သွန်နီရယ်၊ ငံပြာရည်၊ ဆားနဲ့
အချိုမှုန့်အနည်းငယ်တို့ပါနော်။

ငါးရှဥ့်ကြပ်တင်က တော်တော်လေး ခြောက်နေတာမို့ ဓါးနဲ့ သေချာခွဲ၊
အရိုးထုတ်ပြီး အသားလေးတွေကို သေချာမျှင်လိုက်ပါတယ်။
ငရုတ်သီးအခြောက်တောင့်လေးတွေကို ကြက်သွန်ဖြူ ကြက်သွန်နီတို့နဲ့အတူ
မညက်တညက်လေးထောင်းလိုက်ပါတယ်နော်။ ကင်ပွန်းချဉ်ရွက်ကိုလည်း မချွေခင်မှာ
ရေဆေး၊ ရေစစ်ပြီး အရွက်လေးတွေ ချွေထားလိုက်ပါနော်။
အားလုံးအသင့်ဖြစ်ပြီဆိုရင် မီးဖိုပေါ် ဒယ်အိုးတင်၊ ဆီထည့်ပြီး အပူပေးပါ။
ဆီပူလာပြီဆိုရင် ထောင်းထားတဲ့ ငရုတ်သီးကြက်သွန်တို့ကိုထည့်ပြီး ဆီသတ်ပါ။
ငါးအရသာကပေါ့တာမို့ ဆီသတ်တဲ့အချိန်မှာ ငံပြာရည်လေး ထည့်ပြီးမွှေးလာတဲ့အထိ
ဆီသတ်ပါတယ်။ ပြီးတော့မှ ငါးရှဥ့်အသားလေးတွေကို ထည့်ပြီး ကြော်ပါတယ်။
အပေါ့အငံအတွက် ဆားလေးနဲ့ အချိုမှုန့်လေးနည်းနည်းထည့်ပါတယ်နော်။ အဲ့ဒါက
ငါးရှဥ့်ကြပ်တင်ကြော် သီးသန့်ပါနော်။ ဒယ်အိုးထဲက
ငါးရှဥ့်ကြပ်တင်ကြော်တ၀က်ကို ပန်းကန်တစ်ချပ်ထဲမှာ သီးသန့်ဖယ်ထားလိုက်ပါ။
အဲ့ဒါကတော့ ကြွပ်ရွပြီး စပ်စပ်လေးနဲ့ အရသာရှိတဲ့
ငါးရှဥ့်ခြောက်စပ်ကြော်လေးပါနော်။ အဲ့ဒီအကြော်ကိုတော့ ရေနွေးကြမ်းလေးနဲ့
မြည်းရင် အရသာရှိလှပါတယ်နော်။

ပြီးရင်တော့ ကျန်တဲ့အကြော်တ၀က်ထဲကို သန့်စင်ပြီးချွေထားတဲ့
ကင်ပွန်းချဉ်ရွက်လေးနဲ့ ရောကြော်လိုက်ပါ။
ကင်ပွန်းချဉ်ရွက်လေးထည့်တဲ့အတွက် အရသာဘက်မျှသွားအောင် ငံပြာရည်လေးနဲ့
အချိုမှုန့်လေး နောက်ထပ် နည်းနည်းစီ ထပ်ထည့်ပေးပါနော်။ ပြီးရင်တော့
အပေါ့အငံအရသာကိုမြည်းပြီး ဟင်းအိုးချလို့ရပါပြီ။
ကင်ပွန်းချဉ်ရွက်ထည့်လိုက်တဲ့အတွက် ငါးရှဥ့်ကြပ်တိုက်
ချဉ်ငံစပ်အရသာလေးရပါတယ်။ ဒီအကြော်လေးကတော့ မိန်းကလေးတွေအကြိုက်
နယ်ဖတ်စားလို့ရသလို အချဉ်အရသာလေးလည်း ပါတဲ့အတွက် စားရတာ
လျှာသွက်ပါတယ်နော်။ ဟင်းနှစ်မျိုးစားလို့ရအောင် စီစဉ်လိုက်တာပါနော်။
ပဲနီလေးနဲ့ကြာဇံဟင်းရည်သောက်လေးနဲ့ တွဲဖက်စားသုံးပါနော်။

0 comments:

Post a Comment