Monday, August 20, 2007

ကြာဇံကြော်

Reactions: 

ကြာဇံကို အနည်းဆုံး ၁၀ မိနစ်ထိ ရေစိမ်ပြီး ရေစစ်ထားပါ။ ရေစစ်သွားပြီဆိုရင်တော့ ပဲငံပြာရည်နည်းနည်းထည့် ဆားလေး၊ သကြားလေး၊ အချိုမှုန့်လေးထည့်ပြီး နယ်ထားပေးလိုက်ပါ။ ကြက်သား သို့မဟုတ် ကြိုက်နှစ်သက်ရာ အသား၊ အသဲ၊ အမြစ်တို့ကို ခပ်သေးသေးလှီးကာ ဆား၊ သကြား၊ အချိုမှုန့် အနည်းငယ်၊ ဂျုံမှုန့်သို့မဟုတ်ကော်မှုန့်အနည်းငယ်ဖြင့် နယ်ကာ နှပ်ထားပေးပါ။ ၀က်အူချောင်း ကြက်အူချောင်း ကြိုက်တတ်လျှင် ထည့်ကြော်ပါ။ ဒီနေ့ ကြာဇံကြော်ထဲထည့်မယ့် ဟင်းသီးဟင်းရွက်တွေက မုန်လာဥနီ၊ ဂေါ်ဖီ၊ မုန်ညင်း၊ ကညွတ်၊ မှို စတာတွေကိုလှီးချွတ်ဆေးကြောပြီး ရေစစ်ထားပါ။ ကြက်ဥကို သေချာခေါက်ထားပါ။
ကြာဇံကြော်တဲ့နည်းကတော့ ခေါက်ဆွဲကြော်တာနဲ့ ခပ်ဆင်ဆင်ပါပဲနော်။ မီးဖိုပေါ် ဒယ်အိုးတင်ပြီး ဆီကိုအနေတော်မှန်းပြီး ဆီပူအောင်တည်ပါ။ ဆီပူလာရင် ကြက်ဥအရင်ထည့်ကြော်ပါ။ ပြီးရင် ပန်းကန်တစ်ချပ်ထဲသို့ သီးသန့်ဖယ်ထားလိုက်ပါ။ ပြီးလျှင် ကြက်သွန်ဖြူနီကို ထည့်ပြီး ဆီမွှေးသတ်ပါ။ ကြက်သွန်ဖြူနီ အနံ့မွှေးလာပြီဆိုရင် အသားထည့်ပြီး ကြော်ပါ။ အသားလေးတွေ တင်းလာပြီး အရောင်ရဲရဲလေး ဖြစ်လာပြီဆိုရင် ခုနကလှီးထားတဲ့ အသီးအရွက်တွေထည့်၊ ဆား၊ အချိုမှုန့်လေးနည်းနည်းထည့် ပြီးရင် ခဏလေးအဖုံးအုပ်ထားပါ။ နောက်ဆုံးမှာတော့ ကြာဇံထည့်ပြီး အသားအသီးအရွက်တွေနဲ့ သမအောင်မွှေပေးပါ။ ပြီးရင် အရသာ အပေါ့အငံကိုမြည်းပြီး တရုတ်နံနံလေးအုပ်ပြီး မီးပိတ်လို့ ရပါပြီ။ ပြီးတော့မှ ကြော်ထားတဲ့ ကြက်ဥကို လက်တစ်လုံး အထူလောက်လေးတွေ လှီးပြီး အပေါ်က ဖြူးလိုက်ပါ။ ကဲ နောက်ဆုံးအဆင့်ကတော့ အိုးထဲက ကြာဇံကြော်တွေကို ပန်းကန်ပြားလေးထဲ ထည့်ပြီးတော့ ငရုတ်ကောင်းမှုန့်လေးဖြူးလိုက်နော်။ အချဉ်သုပ်ကိုတော့ ကြက်သွန်နီနဲ့ သခွါးသီးကို ပါးပါးလှီး၊ ငရုတ်သီးစိမ်းလေးအုပ်၊ ဆား၊ သကြားလေးထည့်၊ သံပုရာရည်လေးနည်းနည်းဆမ်း၊ ပြီးတော့ ငရုတ်ဆီလေးနဲ့ ရောမွှေလိုက်တယ်။ အဲ့ဒါက ကြာဇံကြော် သပ်သပ်စားရင် ရပြီ။

0 comments:

Post a Comment