Saturday, December 29, 2007

မြိတ်ကတ်ကြေးကိုက်

Reactions: 


မြိတ်ကတ်ကြေးကိုက်လုပ်ဖို့အတွက် လိုအပ်တဲ့ပစ္စည်းတွေကို အရင်ပြောပြပါရစေနော်။ ညှပ်ခေါက်ဆွဲပြား၊ sea food တွေဖြစ်တဲ့ ပုဇွန်၊ ပြည်ကြီးငါးစတဲ့ ကြိုက်နှစ်သက်ရာ ပင်လယ်စာ၊ ၀က် / ကြက်အူချောင်း၊ ပဲပင်ပေါက်၊ ဂေါ်ဖီထုပ်၊ မုန်လာဥနီ၊ စားတော်ပဲပြုတ်၊ ပအုန်းရည် (ရှာလကာရှည်လိုမျိုး)၊ ကြက်သွန်ဖြူ၊ ကြက်သွန်နီ၊ ငရုတ်သီး အစပ်ခွဲကြမ်းမှုန့်လေး၊ ပဲငံပြာရည်အပျစ်၊ ဆား၊ သကြား၊ ကြက်သားမှုန့်အနည်း၊ ဆီ၊ ဘဲဥ၊ တရုတ်နံနံ အနည်းငယ်တို့ပါနော်။

ညှပ်ခေါက်ဆွဲကို ပဲငံပြာရည်အပျစ်၊ ဆား၊ သကြား၊ ကြက်သားမှုန့်တို့နဲ့ နယ်ထားပေးပါ။ ပုဇွန်၊ ပြည်ကြီးငါး၊ ခရု စတဲ့ ပင်လယ်အစားအစာတွေကို သန့်ရှင်းရေးလုပ်၊ ရေစစ်ပြီး ဆား၊ သကြားတို့နဲ့နယ်ထားပေးပါ။ ပဲပင်ပေါက်ကို ရေဆေးပြီး ဇကာနဲ့ စစ်ထားပေးပါ။ ဂေါ်ဖီထုပ်ကိုလည်း အဖတ်လေးတွေခွါ၊ ရေစင်အောင်ဆေးပြီး မထူမပါးလေးတွေဖြစ်အောင် လှီးထားပေးပါ။ မုန်လာဥနီကိုလည်း အခွံနွှာ၊ ရေဆေးပြီး အလှအပလေးတွေဖေါ်ပြီး လှီးပါ။ တရုတ်နံနံကိုလည်း ရေဆေးပြီး မထူမပါးလေး လှီးထားပေးပါ။ ဘဲဥကို ခေါက်ထားပေးပါနော်။ ကြက်သွန်ဖြူနီကို အခွံနွှာ၊ ကြက်သွန်ဖြူကို ဓါးပြားရိုက်၊ ကြက်သွန်နီကို လေးစိတ်ထိုးထားပေးပါ။ ငရုတ်သီးခွဲခြမ်းမှုန့်လေးကို ရေနွေးနဲ့ပျစ်ပျစ်လေးဖျော်ထားပေးပါနော်။
အားလုံးအသင့်ဖြစ်ပြီဆိုတာနဲ့ မီးဖိုပေါ်ကို ဒယ်အိုးတင်၊ ဆီထည့်၊ ဆီပူလာပြီဆိုတာနဲ့ ကြက်သွန်ဖြူနီကိုထည့်ပြီး ဆီမွှေးသတ်၊ ကြက်သွန်စိမ်းနံ့ပျောက်ပြီး နွမ်းသွားပြီဆိုတာနဲ့ ပုဇွန်၊ ပြည်ကြီးငါး၊ ခရုနဲ့ ၀က်အူချောင်းတို့ကို ထည့်ပြီးကြော်၊ ပြီးရင်တော့ ဂေါ်ဖီထုပ်နဲ့ မုန်လာဥနီကိုထည့်ပြီးကြော်၊ ကြက်သားမှုန့်လေးနဲ့ ဆားလေးနည်းနည်းထပ်ထည့်ကြော်၊ ပြီးတော့ ဘေးကပ်ထားပါ။ ပြီးတော့မှ ညှပ်ခေါက်ဆွဲကိုထည့်၊ ပအုန်းရည်နဲ့ ငရုတ်သီးဖျော်လေးကိုပါ ထည့်ပြီး တဆက်တည်းကြော်ပေးပါ။ ပြီးတော့ ပဲပင်ပေါက်ကိုထည့်ပြီး အသားတွေရော အသီးအရွက်တွေရောအကုန်နှံ့အောင်ရောကြော်၊ ပြီးတော့ စားတော်ပဲပြုတ်ကိုထည့်ပြီးသေချာနှံ့အောင် မွှေကြော်၊ အပေါ့အငံအရသာကိုမြည်းပြီး ဒယ်အိုးတစ်ဖက်ကပ်ထားပေးပါ။ ဒယ်အိုးဒီဘက်တခြမ်းကနေ ခေါက်ထားတဲ့ ဘဲဥကို ထည့်ကြော်လိုက်ပြီးတော့မှ ကပ်ကြေးကိုက်ရဲ့အပေါ်ကနေ အုပ်ပေးလိုက်ပါ။ ပြီးရင် ပန်းကန်ပြားတစ်ချပ်ထဲ ကပ်ကြေးကိုက်ကြော်တွေကိုထည့်ပြီး ကြက်သွန်မြိတ်လေးအုပ်လိုက်ပါ။ အချဉ်အတွက် ပဲပင်ပေါက်နဲ့ ငရုတ်သီးစိမ်းကို ပအုန်းရည်ရယ်၊ ဆားလေးနဲ့ အချိုမှုန့်လေးနည်းနည်းနဲ့ မစားခင် လေးနာရီလောက်ကြိုစိမ်ထားတဲ့ အချဉ်နဲ့ တွဲဖက်သုံးဆောင်ပါနော်။
အဲ့ဒါဆိုရင်တော့ ချဉ်စပ်အရသာလေးနဲ့ မြိတ်ကပ်ကျေးကိုက်ကြော်မွှေးမွှေးလေးနဲ့ ပဲတီချဉ်လေးကိုတွဲဖက်သုံးဆောင်ပါနော်။

1 comment:

  1. မြိတ်ကတ်ကြေးကိုက်အစစ်မှာ ဂေါ်ဖီရယ် မုန်လာဥနီရယ် မပါရဘူးအစ်မ

    ReplyDelete